Ushqyshtardyń qaýipsizdik pen eńbek jaǵdaıyna shaǵymdanǵanyn budan buryn jazǵanbyz.
Tótenshe jaǵdaılar mınıstrliginiń resmı ókili Rýslan Imanqulov "Qazavıaqutqarý" AQ pılottarynyń jumystan ketip jatqanyn rastady, dep habarlaıdy Almaty-akshamy.kz
"Jumysshylardyń bireýi synaq merziminen ótip júrgen. Qalǵandary bergen ótinishterine qaraı sheshiledi. Eshkimdi májbúrli túrde jumystan shyǵarmaıdy. Biraq ózderi jumystan shyǵýǵa nıet bildirip tursa, olardy ustaýǵa da eshkimniń quqyǵy joq", - dedi Imanqulov Sputnik Qazaqstan tilshisine bergen suhbatynda.
Onyń aıtýynsha, uıym qyzmetkeleriniń jalaqysyn kótermeıdi. Sebebi qazirgi mólsheri ortasha kórsetkishten joǵary.
"Jalaqyny kóterý máselesi qaralyp jatqan joq. Onyń mólsheri ortasha deńgeıden joǵary, 640 myń teńge men 2,5 mıllıon teńgeniń mańaıynda bolyp tur", - dep atap kórsetti mınıstrliktiń resmı ókili.
Aıta keteri, sáýirdiń basynda "Qazavıaqutqarý" AQ pılottary osy saladaǵy qaýipsizdik pen eńbek jaǵdaıyna shaǵymdandy. Sol kezde 23 pılot jumystan ketýge aryz jazdy. Tótenshe jaǵdaılar mınıstri Iýrıı Ilın barlyq aryzdar boıynsha qyzmettik tekseris júrgiziletinin aıtty.
Sondaı-aq jumystan ketetin árbir pılottyń oqýyna jumsalǵan búdjet qarjysyn qaıtarý mindeti bar ekenin eske saldy.