Jeti qazynanyń biri qazaqy ıtter memlekettik deńgeıde qorǵaýǵa alynýy múmkin
Kókshetaýlyq Erǵazy Baımol 10 jylǵa jýyq tazy baptaýmen aınalysyp keledi. Qazir onyń 4 birdeı ańshy ıti bar. Aıtýynsha, asyltuqymdy ıt asyraý búginde ekiniń biriniń qolynan kelmeıdi. Sebebi bir tazynyń tamaǵynyń ózine jylyna 100 myń teńgeden astam qarjy ketedi. Odan bólek kútimi men tasymaldaýy taǵy bar, dep habarlaıdy Almaty-akshamy.kz.
«Et kóbinese. Vaksınasy bolady jyl saıyn salynatyn. Túrli jarysqa qatysyp júrgennen keıin sol kezde alys jerlerde, basqa oblystarda bolǵan jarystar bolady, sonyń barlyǵyna óz qarajatymyzben baramyz. Keıde sol qarajat bolmaǵan soń jarystarǵa qatysa almaı qalatyn kúnder de bolady», - dedi ıtbegi Erǵazy Baımol.
Osylaı degen jas ıtbegi memlekettik qoldaýdan úmitti. Biraq sol úmit aqtala ma? Jaýapty mınıstrlik Astana ókilderiniń sózinshe, qazaqy ıtterdi qorǵaýǵa qajet degen 1,4 mlrd teńge – salanyń 3 jyldyq búdjeti. Al ol tazy men tóbetti saqtap, kóbeıtýmen aınalysatyn arnaıy ǵylymı ortalyqqa jáne ıtbegiler arasynda túrli is-sharalar ótkizip, ulttyq saıatshylyq ónerdi damytýǵa atsalysyp júrgen qoǵamdyq birlestikterge úlestirilmek.
«Kóptegen suraq týyndap jatyr. Aqsha qalaı ustalynady? Aqsha qaıda barady? Aqsha basqa jaqqa ketip qalmaı ma? Ol ózi kóp te aqsha emes. Biraq ony óte tıimdi paıdalaný kerek. Árbir 3-4 ıt ustap otyrǵan kisilerge berse, aqsha talan-tarajǵa ketip qalady. Olar úlken bir uıymǵa jınalý kerek. Meniń óz oıym. Biraq bolashaqta bul másele de qaralatyn shyǵar dep oılaımyn», - dedi QR Parlamenti Májilisiniń depýtaty Ámirhan Rahymjanov.
Al tazy ósirýshilerdiń múddesin qorǵap júrgen federasıa tóraǵasy Almas Oralbektiń aıtýynsha, «Qazaqy ıtterge memlekettik qoldaý kórsetiledi» degen habar taraǵaly beri elimizde túrli uıymdar qaptap ketken. Olardyń tek qaǵaz júzinde ǵana jumys istemesine kim kepil?, - deıdi sarapshy. Salany damytamyz desek, eń aldymen kásibı mamandar qajet.