Qapshaǵaı sý elektr stansıasynyń salynýyna yqpal etken Dinmuhamed Qonaev, Asanbaı Asqarov pen Shapyq Shókınge memorıaldyq eskertkish ashyldy, dep habarlaıdy Almaty-akshamy.kz Inform.kz-ke silteme jasap.
Aıta keteıik, bıyl atalǵan stansıanyń boı kóterýine eleýli úles qosqan tarıhı tulǵalar Dinmuhamed Qonaev pen Shapyq Shókınniń týǵanyna 110 jyl tolyp otyr. Osy mereıli datany atap ótý maqsatynda olardyń qurmetine Qonaev qalasynda memorıaldyq eskertkish qoıyldy.
«Bıyl Dinmuhamed Ahmetulynyń 110 jyldyǵymen qatar, Qapshaǵaı sý elektr stansıasy jobasynyń avtory, Shapyq Shókınniń 110 jyldyǵy jáne kórnekti memleket qaıratkeri Asanbaı Asqarovtyń 100 jyldyǵymen erekshelenip otyr. Óńirimizdiń órkendeýine ólsheýsiz úles qosqan birtýar azamattardyń eńbekterine laıyqty baǵa berilip, memorıaldy eskertkish ashyldy. Ata-babamyz ańsaǵan egemendigimiz eńseli, bolashaǵymyz baıandy bolsyn!», - dedi Almaty oblysynyń ákimi Marat Sultanǵazıev.
Saltanatty shara barysynda memleket jáne qoǵam qaıratkeri, Dinmuhamed Qonaevtyń nemeresi Eldar Qonaev energetıka salasynyń ardageri Erlan Qyrqynbaevqa «Qonaevtyń 110 jyldyǵy» merekelik medalin tabys etti.
«Bul jerdiń tarıhy tereńde jatyr. Aıta ketsek, Shapyq Shókın İle arnasyn bógep, aǵysy qatty ózen boıynda sý elektr stansıasyn salý kerektigin aıtyp, úlken jobany qorǵap shyqty. Sodan keıin bul ıdeıa sol kezdegi Qazaqstannyń basshysy Dinmuhamed Qonaevqa unap, stansıa qurylysy bastalyp ketti. Al alǵashqy irgetasy 1969 jyly qalanǵany bárimizge belgili. İle ózeni boıynda sý elektr stansıasy salynyp qana qoımaı, qazirde oblys ortalyǵyna aınalǵan qala boı kóterdi», - dep stansıanyń salyný tarıhyna toqtaldy Erlan Qyrqynbaev.
Foto: gov.kz