Ábdibek Qalıbek Japonıadaǵy zamanaýı qondyrǵylarmen jabdyqtalǵan ortalyq aýrýhanada jumys isteıdi.
Ol qazir qurttyń sýynan adamnyń ımýnıtetin kóterip, qartaıýdyń aldyn alatyn dári ázirlep jatyr, dep habarlaıdy Almaty-akshamy.kz
«Ózimizdiń ulttyq taǵamymyz qurttyń sary sýynan bir bıoqospa jasap jatyrmyn. Ony «Fýzılaks» dep atadym. Ónimdi ári ataýyn patenttep aldym. Bul dári ımýnıtetti kóteredi. Ásirese, onyń sportshylarǵa tıgizetin paıdasy kóp. Olar, ádette, bulshyq etin qataıtý úshin kóbine aqýyz iship jatady ǵoı. Qurttyń sýynda sondaı qasıet bar. Bul qospanyń ishinde on alty túrli quram bar. Mysaly, qurttyń sýyn zerttep kórseńiz, ishinen on túrli quram tabasyz. Soǵan ózim ázirlegen alty túrli qospany qostym. Osy dárini ázirlep jatqanymyzǵa bes jyl boldy. Japonıada bir dárini shyǵarý úshin kem degende tórt-bes jyl ketedi. Buıyrsa, osy jyldyń sońyna deıin úsh túrli ónimdi ázirlep shyǵarmaq oıymyz bar, – deıdi Ábdibek Qalıbek.
Ábdibek Qalıbek – Qytaıdyń Úrimshi qalasynda týyp-ósken qazaq. Shyńjań medısınalyq ýnıversıtetinde klınıkalyq medısına mamandyǵyn alǵan. Keıin 2004 jyly Japonıadaǵy Juntendo ýnıversıtetiniń magıstratýrasy men doktorantýrasyn bitirgen. Onyń endigi armany – týǵan eline, jerine paıdasyn tıgizý.
«Jas ulǵaıǵan saıyn qoǵamǵa paıda keltirýdiń oraıyn izdep, artyńnan iz qaldyrý úshin shákirt tárbıeleýdi, bilim men biliktilikti durys arnaǵa baǵyttaýdy kóp oılaıdy ekensiń. Eldegi medısına júıesin ózgertetin bilikti maman retinde baryp, eńbek etkim keledi. Osy salada jınaǵan jıyrma jyldyq tájirıbeme súıenip, Qazaqstan medısınasyn ilgeriletýge múmkindik berse eken deımin», - dedi ol «Túrkistan» gazetine bergen suhbatynda.