Búginde qazaqtyń halyq aýyz ádebıeti komıks túrinde jaryq kórýde.
Qylqalam sheberleri kishkentaı oqyrmandarǵa batyrlar men handardyń jáne uly tulǵalardyń ómirin sýret arqyly jetkizip jatyr. Shymkenttik 24 jastaǵy senarıst Bek-Ata Danıaldyń týyndylary AQSH, Ulybrıtanıa men Úndistandaǵy basylymdarda shyǵarylyp jatyr. Endi óner ıesi jýyrda batyrlar jaıly komıks jazyp, ony álemdik naryqqa shyǵarýdy kózdep otyr, dep habarlaıdy Almaty-akshamy.kz 24.kz-ke silteme jasap.
Óner ıeleri komıksti damytý arqyly óskeleń urpaqty tárbıelep, kitapqa baýlýǵa bolady deıdi. Tipti ulttyq qundylyqtarymyzdy dáriptep, ulttyq sana men ar-uıat syndy qasıetterdi de osy janr arqyly jetkizýde. Qylqalam sheberi Magıra Tileýberdına da bir jyldan asa ýaqyt qazaqsha komıkske bet burǵan. Onyń aıtýynsha, qazir jas oqyrman qazaq handary men batyrlarynyń taǵdyry, ómiri men qaısarlyǵyna qyzyǵady.
«Men osy ádebıet tulǵalarynan shabyttanamyn. Men úshin olar úlken tulǵalar. Sol úshin men olarǵa qarap, keıipkerlerimdi jasaımyn. Olardy basqa turǵyda, zamanaýı túrde kórsetkim keledi. Biz Bek-Ata senarıst ekeýmiz «Esek mergen» batyr týraly komıks shyǵarǵymyz kelgen. Sol úshin biz kollaborasıa retinde jumys istep, men sýret jaǵyn damytyp jatyrmyn», - deıdi sýretshi-komıksıst Magıra Tileýberdına.
Magıra Tileýberdına senrıst Bek-Ata Danıalmen birlesip, jýyrda jańa týyndy shyǵarmaq. Onda qazaq fólklorynda kezdesetin, boıynda joıqyn kúshi bar, «jeztyrnaq» ta beınelengen. Iaǵnı, tarıhtyń málim de beımálim syryn osy komıks arqyly oqyrmanǵa jetkizýdi kózdep otyr.
«Keıipkerlerdiń kelbetine emosıa qosyp, jan bitirý arqyly tarıhty oqyrmandarǵa jetkizý ońaı. Shetelde «batyrdyń saıahaty» degen uǵym bar. Bizdegi batyrlardyń da álgi «sýpermenderden» qaı jeri kem? Eger olar qıaldan týsa, bizdiń batyrlar – ómir súrip, qazaq halqyn qorǵap, erlik jasaǵan jandar. Endi olardyń teńdesi joq tabandylyǵyn osy janr arqyly dáriptep, tipti shet memleketterdiń naryǵyna da shyǵýǵa bolady. Meniń týyndylarym Ulybrıtanıa, AQSH pen Úndi elderinde de bar», - deıdi senarıst, komıksıst Bek-Ata Danıal.
On saýsaǵynan óneri tamǵan komıks salýshylar 20 bettik týyndyǵa kóz maıyn taýysyp, 2-3 aı ýaqytyn jumsaıdy. Árıne, zaman aǵymyna saı tarıhty, ádebıet pen ilimdi de komıks arqyly oqytýǵa bolady. Tipti túıtkildi máselelerdi de osy janr arqyly jetkizip júrgender de bar. Bastysy, boıda daryn, ynta men qajyrlyq bolý kerek.