Bıyl álemde jumyssyzdar sany 3 mln-ǵa artady.
Ekonomıkanyń quldyraýyna baılanysty adamdar sapasy tómen jumys oryndaryna kelisýge májbúr bolady. Halyqaralyq eńbek uıymy jańa baıandamasynda osyndaı boljam jasap otyr, dep habarlaıdy Almaty-akshamy.kz 24.kz-ke silteme jasap.
Sarapshylardyń pikirinshe, bul álemdegi geosaıası ahýaldyń ýshyǵýy, pandemıanyń kesiri men logıstıkalyq býyndardyń ajyraýyna baılanysty. Sondaı-aq baıandamada túrli aımaqtarda 2023 jyly eńbek naryǵy ártúrli ózgeretini aıtylǵan. Máselen, Afrıka men arab elderinde jumys oryndarynyń sany 3 paıyzǵa artady. Al Soltústik Amerıkada jumyssyzdyq deńgeıi ósetin túri bar. Ýkraınadaǵy janjal Eýropa men Ortalyq Azıa memleketterine eń úlken áser etti. Degenmen osy aımaqtarda jumyssyzdar sany aıtarlyqtaı óspeıdi.
«Boljam boıynsha álemde jańa jumys oryndarynyń ashylýy 1%-ǵa deıin baıaýlaıdy. Bul byltyrǵy jylmen salystyrǵanda eki ese az. Jumys izdep júrgen 208 mln adam bar. Buǵan otbasylyq jaǵdaıǵa baılanysty eńbek ete almaıtyn taǵy 267 mln turǵyndy qosyńyz», - deıdi Halyqaralyq eńbek uıymy bas dırektorynyń kómekshisi Manýela Tomeı.
Sarapshylardyń pikirinshe, aldaǵy jyldary sıfrlandyrý men avtomattandyrýdyń saldarynan eńbek naryǵy túpkilikti ózgeredi. Kóptegen mamandyqtar, tipti ekonomıkanyń keıbir salalary joıylady nemese qajeti azaıady. Alaıda onyń esesine ınovasıalyq jańa mamandyqtar paıda bolady. Sondyqtan biraz adamǵa ómirden artta qalmas úshin, jańa mamandyqtar ıgerýge týra keledi.