Baılanys naryǵynda mindettemelerine salǵyrt qaraıtyn operatordyń kúdikti aıla-tásilderi tolastamaı tur...
Sońǵy ýaqytta «Qazaqtelekom» jumysynyń shıkiligine aryzdanatyn oqyrmandarymyz kóbeıdi. «Alataý Aqparat» ujymynyń da atalǵan kompanıaǵa shaǵymy bar.
Prezıdentimiz Qasym-Jomart Toqaevtyń tapsyrmasy boıynsha el ekonomıkasyn kóterýdegi jańa baǵdar, onyń ishinde memleket naryǵyndaǵy iri monopolısermen kúres óz jemisin berýde. Atap aıtqanda, jyl basynan beri «Qazaqtelekom» aksıalarynyń belgili bir bóligi memleket menshigine qaıtaryldy. Alaıda, Ulttyq baılanys operatorynyń jumysyndaǵy shıkilikterge tutynýshylar narazylyǵy áli de toqtamaı tur. Monopolıs kompanıanyń qıturqy «sqemalarynan» baılanys qyzmetterin adal tutynýshylar zardap shegýde. Mindettemelerine salǵyrt qaraıtyn operatordyń aıla-tásilderiniń kesiri «Alataý Aqparat» jaýapkershiligi shekteýli seriktestigine de tıdi.
Kóptegen jyl boıy «Qazaqtelekom» aksıonerlik qoǵamy «Alataý Aqparat» jaýapkershiligi shekteýli seriktestigine (ataýy ózgergenge deıin «Almaty aqshamy» gazeti» JSHS jáne «Vechernıı Almaty «gazeti» JSHS bolǵan) qyzmet kórsetip kelgen.
2020 jyldyń qyrkúıeginde «Alataý Aqparat» JSHS-nyń býhgalterıasy qarjylaı shyǵystardy zerdelep, baqylaý barysynda «Qazaqtelekomnyń» kórsetiletin qyzmetterge sáıkes kelmeıtin somadaǵy aqshalaı ótem suraǵanyn anyqtaıdy. İstiń mán-jaıyna qanyǵý úshin «Alataý Aqparat» kompanıasy Ulttyq baılanys operatorynyń keńsesine hat joldady.
«Qazaqtelekom» qyzmetkerleri óz jaýabynda «Alataý Aqparat» JSHS-yna 319 (!) abonenttik telefon nómirleri tirkelgenin habarlady. Oǵan qosa kóp jyldan bergi turaqty oqyrmandarymyzǵa jaqsy tanys «Almaty aqshamy» jáne «Vechernıı Almaty» gazetteri redaksıalarynyń burynǵy meken-jaılarynda (Abylaı han dańǵyly, 2, Almaty-2 vokzalynyń janynda) taǵy bes abonenttik nómirdiń tıesili ekenin aıtady. Aıta ketken jón, bizdiń basylymdar aıtylǵan mekenjaıdan 2011 jyly kóship ketken!
«Alataý Aqparat» atyndaǵy úsh júzden astam abonent týraly aıtqanda, myna faktini oıǵa alǵan jón: bizdiń kompanıanyń shtatynda dástúrli túrde 80-ge jýyq adam jumys isteıdi. Bul tártip qanshama jyldan beri ózgermegen.
Bizdiń kompanıaǵa úsh júzden astam abonenttik nómirdiń jazylýy kelesideı jaǵdaıda oryn alǵan: bir kezderi ınternet baılanystyń sapasyna narazy bolǵan «Almaty aqshamy» jáne «Vechernıı Almaty» basylymdarynyń basshylary Ulttyq operatordan bul jaǵdaıdy durystaýdy ótinedi. «Qazaqtelekom» ókilderi óz kezeginde jańa sharttar ákelip, qujattarǵa qol qoıylǵannan keıin barlyq máselelerdi sheshýge ýáde beredi. Aıtylǵan ýaqytta ınternetke qosylý jyldamdyǵy sekýndyna nebári 6 Mbıt boldy. Bul jyldamdyqtyń jumysy aqparat taratýǵa negizdelgen 80 adamdyq ujym úshin óte az ekeni aıtpasa da túsinikti. Atalmysh jańa sharttarǵa qol qoıylǵannan keıin «Alataý Aqparat» kompanıasy úsh júz abonenttik nómirdiń ıegeri boldy. Alaıda, ınternetke qosylý jyldamdyǵy ýáde etilgendeı emes, nebári 2 Mbıtke ulǵaıdy. Qyzmet kúshi 6 Mbıt ornyna 8 Mbıt bolǵanymen, qyzmet quny aıyna 480 myń teńgege deıin ósken.
«Qazaqtelekom» kompanıasy jeke tulǵalarǵa jyldamdyǵy sekýndyna 100-den 500 Mbıtke deıin jetetin qyzmetterdi bar bolǵany 7 myń teńgege jalǵaıtynyn eskersek, ınternet baılanysy álsiz úsh júz abonenttik nómirge jarty mıllıon teńgege jýyq aqsha alýy ádil qyzmetke emes, alaıaqtardyń arbaýyna uqsaıdy.
Bul dáleldi aıǵaqtarymyzben monopolıs kompanıa ókilderi alǵashqyda kelisedi. Sóıtip, «Alataý Aqparat» JSHS men «Qazaqtelekom» AQ arasynda kelissóz júrgizip, nátıjesinde qaıta esep júrgizýge ýaǵdalasady. Alaıda, is júzinde Ulttyq operator qyzmetkerleri bul baǵyttaǵy jumys barysyn soza bergendikten, olarǵa bizdiń taraptan taǵy da hat joldanady. Oǵan tıisti másele «Almaty telekom» óńirlik telekomýnıkasıa dıreksıasynyń qaraýyna shyǵarylǵany jóninde jaýap aldyq.
«Qazaqtelekom» 2020 jyldyń 24 qarashasynda óńirlik dıreksıanyń 2 297 000 teńge sommaǵa qaıta esepteý júrgizgeni týraly esep berdi. 2021 jyldyń 29 qańtar kúni Ulttyq operator ishki tekserýler negizinde qaıta esepteý somasy 8 575 921 teńgege deıin óskenin jáne kináli qyzmetkerler men onyń tikeleı basshysyna tártiptik jazalaý sharalary qabyldanǵanyn habarlady.
Degenmen, bir jyldan astam ýaqyt boıy eseptelgen 8,5 mıllıon teńge «Alataý Aqparat» JSHS-ine qaıtarylmady. Osyǵan oraı bizdiń tarapymyzdan ótken jyldyń aqpan aıynda «Qazaqtelekom» aksıonerlik qoǵamynyń ústinen sotqa deıingi shaǵym jiberildi. Alaıda, kompanıa ókilderi ýaǵdalastyqtan, kelissózden jaltara bastady. Sotqa deıingi taǵy bir shaǵym jiberilgende, olar óz esepterimen ózderi kelispeıtinin jáne eshqandaı qarajatty keri qaıtarmaıtynyn málimdedi.
Almatynyń mamandandyrylǵan aýdanaralyq sotynda «Qazaqtelekomǵa» qarsy talaptardy qaraý bir jylǵa jýyq ýaqytqa sozyldy. Osy ýaqyt ishinde «Qazaqtelekom» AQ zańgerleri «Alataý Aqparat» JSHS-na 1,6 mıllıon teńge bereshek somasyn óndirip alý týraly qarsy aryz jazady. MAES 2021 jy ldyń jeltoqsanynda kelip túsken bul aryzdy osy jyldyń aqpan aıynda qanaǵattandyryp, bizdiń kompanıamyzǵa 8,5 mıllıon teńgeni qaıtarý týraly talapty qabyldaýdan bas tartty.
Sottyń sheshim shyǵarýdaǵy dálelderin erekshe atap ótken jón. Óz sheshimin qandaı da bir faktilerge negizdeý úshin sot «Qazaqtelekomnyń» esepteýdegi óz qatelikterin moıyndaıtyn hattaryn sanaýdan bas tartty. Onyń sebebin «Qazaqtelekom» bul hattardy keıin qaıtaryp aldy» dep túsindirdi. Azamattyq kodekske sáıkes, hattarmen qosymsha rastalǵan óz mindettemelerinen birjaqty bas tartýǵa bolmaıdy. Osy dálelderge qaramastan, Almaty MAES monopolısiń paıdasyna sheshim shyǵaryp, «Qazaqtelekomǵa» aıla-tásilmen aqsha óndirýdegi qıturqy is-áreketterin jalǵastyrýǵa múmkindik bergendeı boldy.
Qazir júrip jatqan iri monopolısermen kúres barysynda tıisti organdar quryǵy uzyndyǵyn paıdalanyp jaýapkershilikten jaltaryp júrgen Ulttyq baılanys operatory qyzmetiniń osy bóligin muqıat tekseredi dep úmittenemiz.