QR Qurmetti konsýly laýazymyna ıtalándyq «SCN» kompanıasynyń basshysy Valentına Massa taǵaıyndaldy
Neapol qalasynda Qazaqstan Respýblıkasynyń Qurmetti konsýldyǵy ashyldy, dep habarlaıdy Almaty-akshamy.kz SİM baspasóz qyzmetine silteme jasap.
QR Qurmetti konsýly laýazymyna ıtalándyq «SCN» kompanıasynyń basshysy Valentına Massa taǵaıyndaldy. Saltanatty ashylý rásimi Qazaqstan Respýblıkasynyń Italıa Respýblıkasyndaǵy Elshisi Erbolat Sembaevtyń qatysýymen ótti.
Elshi óz sózinde Qazaqstan men Italıa arasyndaǵy dıplomatıalyq qarym-qatynastardyń ornaǵanyna 30 jyl tolý qarsańynda atalǵan is-sharany ótkizýdiń sımvoldyq máni bar ekenin aıtty. Sonymen qosa ol Qurmetti konsýldyqtyń ashylýy eki eldiń ekijaqty kún tártibin, sonyń ishinde saýda, ınvestısıalyq jáne gýmanıtarlyq baǵyttardy keńeıtý jónindegi saıası erik-jigeriniń kórsetkishi bolyp tabylatynyn atap ótti.
Qazaqstandyq dıplomat mıllıonnan astam halqy bar, sonymen birge damyǵan týrısik jáne kólik-logıstıkalyq ınfraqurylymymen tanymal Italıanyń úshinshi iri qalasy bolyp tabylatyn Neapoldegi Qurmetti konsýldyqtyń ashylýy Qazaqstan men Italıa arasyndaǵy yntymaqtastyqty damytýǵa yqpal etetinine senim bildirdi.
Óz kezeginde V.Massa Qazaqstan Úkimetine senim bildirgeni úshin alǵys aıtyp, eki el arasyndaǵy ózara is-árekettiń áleýetti baǵyttaryn belgiledi. Sóz sóıleý barysynda ol ıtalándyq kásipkerlerdi qazaqstandyq áriptestermen iskerlik baılanystar ornatý jáne birlesken jobalardy iske asyrý úshin Qurmetti konsýldyqtyń múmkindikterin paıdalanýǵa shaqyrdy.
Keńseniń negizgi fýnksıasy elimizdiń Kampanıa óńirimen ekonomıkalyq, mádenı-gýmanıtarlyq baılanystardy jolǵa qoıý, sonymen qosa QR azamattarynyń quqyqtaryn qorǵaýǵa járdemdesý bolyp tabylady.
İs-sharaǵa qala basshylyǵy, jergilikti BAQ jáne bıznes ókilderi qatysty. Rásimge qatysýshylarǵa Qazaqstannyń syrtqy saıası jáne ekonomıkalyq jetistikteri, eldegi saıası reformalar jáne ınvestısıalyq ahýaldyń tartymdylyǵy týraly baıandaıtyn aqparattyq materıaldar tabys etildi.