Satbayev University-diń qaýymdastyrylǵan profesory Inesh Kenjına atom elektr stansıasynyń qurylysy Qazaqstanǵa kóptegen salalarda uzaq merzimdi turaqtylyqqa qol jetkizýge múmkindik beretinin aıtty, dep habarlaıdy aqshamnews.kz
Sarapshynyń aıtýynsha, bastapqy kezeńde AES qurylysyna eleýli ınvestısıalar qajet bolǵanymen, onyń jumys shyǵyndary kómir nemese tabıǵı gazben jumys isteıtin jylý elektr stansıalaryna qaraǵanda áldeqaıda tómen. Bul, ásirese, otyn aýystyrý kezeńiniń uzaqtyǵy (1,5 – 2 jyl) jáne AES-tiń otyn qunynyń elektr energıasyn óndirýdiń ózindik qunyndaǵy úlesiniń shamamen 10%-dy quraıtyndyǵymen baılanysty. Bul faktorlar tutynýshylar úshin energıa baǵasynyń turaqtylyǵyn qamtamasyz etedi.
– Uzaq merzimdi perspektıvada atom energetıkasy ekonomıkalyq turǵydan tıimdi bola túsedi, óıtkeni AES-tiń qyzmet etý merzimi qazirgi tańda 60 jyldy qurap, bolashaqta ony 80 jáne odan da kóp jylǵa deıin uzartý múmkindigi bar. Sonymen qatar, AES Qazaqstannyń energetıkalyq júıesin álemdik energetıkalyq naryqtaǵy ózgeristerge tózimdi etedi, kómirsýtekterge táýeldilikti azaıtyp, munaı men gazdyń álemdik baǵasyndaǵy aýytqýlardan eldiń ekonomıkasyn qorǵaıdy. Bul Qazaqstanǵa ekonomıkanyń turaqtylyǵyn arttyryp, shyǵyndardy aldyn ala boljap otyrýǵa múmkindik beredi, – dep atap ótti Inesh Kenjına.
Onyń pikirinshe, AES sonymen qatar eldiń ekologıalyq jaǵdaıyn jaqsartýǵa, kómirtegi shyǵaryndylaryn azaıtýǵa yqpal etip, jahandyq energetıkalyq naryqtaǵy bolashaq qıyndyqtarǵa daıyndalýǵa kómektesedi. Atom energetıkasy Qazaqstanǵa energetıkalyq qaýipsizdikti nyǵaıtýǵa jáne ekonomıkany syrtqy áserlerden qorǵaýǵa múmkindik beredi.