Úkimette Premer-Mınıstrdiń orynbasary Serik Jumanǵarınniń tóraǵalyǵymen ótken otyrysta aýyl sharýashylyǵy janýarlaryn qadaǵalaý júıesin jetildirý prosesi talqylandy.
«Etti veterınarıalyq-sanıtarıalyq saraptaý» jańa modýliniń arqasynda aýyl sharýashylyǵy janýarlaryn birdeılendirý aqparat júıesinde (ASHJB) mal soıý oryndarynda saraptama aktisi men anyqtama berý jáne janýardyń ómirlik sıkli týraly aqparat jınalǵan QR-kod jasaý prosesi sıfrlandyryldy.
Bul QR et satylatyn oryndarǵa ornalastyrylady, ol janýarlardy veterınarıalyq tekserýsiz jáne et men organdardy teksermeı mal soıýdyń aldyn alýǵa múmkindik beredi. Jańa modýl Almaty, Pavlodar jáne Jetisý oblystarynda pılottyq rejımde synalyp jatyr, dep habarlaıdy Almaty-akshamy.kz QR Premer-Mınıstriniń resmı aqparattyq resýrsyna silteme jasap.
Bul tásil shekaralyq ótkizý beketterinde de engizildi. Kelip túsken júkter týraly málimetter aqparat júıesine engiziledi, tekserý jáne synama alý aktileriniń elektrondyq nusqasyn qalyptastyrady, olar memlekettik veterınarıalyq ınspektorǵa jáne veterınarıalyq zerthana qyzmetkerine jiberiledi. Júıe Pavlodar oblysynyń shekara mańyndaǵy beketterinde testileýden sátti ótti.
«El aýmaǵynda mal soıatyn 904 nysan bar, onyń ishinde 109-y – et óńdeý kásiporny, 281-i – mal soıý pýnkti jáne 514 mal soıý alańy. Veterınarıalyq talaptarǵa sáıkes kelmegendikten, 106 mal soıý nysany jabyldy, 2023 jylǵy qańtar-qazan aılary aralyǵynda 661 mal soıý alańynyń esep nómirleri keri alyndy», — dedi aýyl sharýashylyǵy vıse-mınıstri Amangalıı Berdalın.
Sonymen qatar vıse-mınıstr barlyq iri aýyldyq okrýgte veterınarıalyq-sanıtarıalyq saraptama zerthanasy bar mal soıý pýnktilerin ashý qajettigin atap ótti.
«Mal soıý alańdary ótpeli kezeńde májbúrli shara retinde ashylǵandyqtan, qazir zańnamaǵa ózgerister engizý maqsatynda jumys istep jatyrmyz, sodan keıin mal soıý alańdary joıylatyn bolady», — dedi aýyl sharýashylyǵy vıse-mınıstri.
Sonymen qatar keńeste Amangalıı Berdalın Qazaqstan aýmaǵynda janýarlar men qustardy jospar boıynsha dıagnostıkalaý jáne vaksınalaý týraly aıtty. Dıagnostıkalyq jáne profılaktıkalyq is-sharalar týraly barlyq málimet ASHJB bazasyna engizilgen. Nátıjesinde sońǵy jyly elimizde qaýipti aýrýlar oshaqtary 38%-ǵa tómendegen.
Shegirtkege qarsy kúreske daıyndyq týraly aýyl sharýashylyǵy vıse-mınıstri Azat Sultanov baıandady. Sońǵy jyldary Aqtóbe jáne Qostanaı oblystarynda zıankesterdiń taralý alańdary ósti (1 mln ga nemese respýblıka boıynsha jalpy alańnyń 69%-y). 2023-2024 jyldary shegirtke taralýynyń 11 jyldaǵy rekordtyq kórsetkishi oryn alyp otyr. Egistik jerlerdi shegirtkeden ýaqytyly saqtaý úshin aldyn ala memlekettik satyp alý jospary jasalyp, konkýrstar jarıalandy. Ońtústik óńirlerde qajetti jumystardy sáýir aıynda, soltústikte mamyrda bastaý josparlanyp otyr.
Keńes qorytyndysy boıynsha Serik Jumanǵarın Aýyl sharýashylyǵy mınıstrligine oblys ákimdikterimen birge mal soıýdaǵy jańashyldyqtar, olardyń artyqshylyqtary boıynsha turǵyndar arasynda keń aýqymdy aqparattyq jumys júrgizýdi tapsyrdy. Sondaı-aq egistik jerlerdi shegirtkeden ýaqytyly óńdeý úshin barlyq qajetti prosedýrany jedel júrgizýdi tapsyrdy.