QR Premer-Mınıstriniń orynbasary Tamara Dúısenovanyń tóraǵalyǵymen ótken keńeste elektrondyq kitaphana júıesiniń damýy talqylandy.
Jıynǵa Mádenıet jáne aqparat, Sıfrlyq damý, ınovasıalar jáne aeroǵarysh ónerkásibi mınıstrlikteri, Ulttyq akademıalyq kitaphananyń ókilderi qatysty, dep habarlaıdy Almaty-akshamy.kz
Búginde elimizde 11 myńnan asa kitaphana túrli aqparattyq júıeler men katalogtardy qoldanyp keledi. Elimizdegi kitap qoryn júıeleý úshin biryńǵaı avtomattandyrylǵan platforma jasaqtaý jumysy bastaldy. Mamandardyń sózinshe, onyń arqasynda oqyrmandar qajetti kitapty nemese onyń elektrondy nusqasyn ońaı taba alady. Júıeni engizý aıasynda barlyq kitaphanaǵa kirý múmkindigi qarastyrylǵan biryńǵaı elektrondy oqyrman bıleti ázirlenedi. Qoldanýshylar elektrondy úkimet portaly arqyly tirkelip, bıletke qol jetkizbek.
Platformada kitap qoryn onlaın tolyqtyrý fýnksıasy qarastyrylǵan. Ony jeke baspalar da paıdalana alady: jaryq kórgen jańa týyndylar júıege engizilip, aqyly jazylýshylarǵa qoljetimdi bolmaq. Osylaısha jeke baspalar men avtorlardyń múddelerin qorǵaý josparlanǵan.
«Biz eldegi baspalar ókilderimen kezdesip, kitaptardy jarıalaý tártibin túsindirdik. Olar usynylǵan sharttarǵa kelisim berdi», — dedi mádenıet jáne aqparat vıse-mınıstri Arman Júdebaev.
Platformany pılottyq rejımde 2024 jyly iske qosý josparlanǵan. Bastapqyda ol iri kitaphanalar bazasynda jumys isteı bastaıdy.
«Sıfrlyq platforma elimizdegi barlyq kitap qory azamattarǵa qoljetimdi bolýy úshin ázirlenip otyr. Sondyqtan eń aldymen elektrondy nusqaǵa 10 iri kitaphana ótedi. Al qalǵandary sáıkestendirý jumystaryn qolǵa alýy kerek. Kitap qory tolyqtaı sáıkes kelgen jaǵdaıda kitaphanalar oqyrmanǵa arnalǵan izdeý baǵdarlamasyn beıimdeýi tıis», — dep atap ótti Tamara Dúısenova.