Qazaqstannyń Túrkıadaǵy elshiligi qazaqstandyqtarǵa demonstrasıalar men mıtıńilerge jeke qatysýdan aýlaq bolýdy surady.
— Qalyptasqan jaǵdaıǵa baılanysty halyq kóp jınalatyn oryndarǵa barmaýǵa, sherýler men mıtıńilerge qatysýdan bas tartýǵa, kúsheıtilgen qaýipsizdik sharalaryn saqtaýǵa, qyraǵylyq pen saqtyqqa, jańalyqtardy qadaǵalap, bıliktiń nusqaýlyqtaryn oryndaýǵa jáne Qazaqstan Respýblıkasynyń Túrkıadaǵy dıplomatıalyq ókildikterimen baılanysta bolýǵa shaqyramyz, — delingen elshilik habarlamasynda.
Elshilik áleýmettik jelilerde demonstrasıalar (mıtıńter) týraly aqparatty jáne aǵymdaǵy oqıǵalarǵa qatysty jeke baǵalar men pikirlerdi taratýdan bas tartýǵa shaqyrdy.
— Sonymen qatar áleýmettik jelilerde demonstrasıalar (mıtıńter) týraly aqparatty jáne aǵymdaǵy oqıǵalarǵa qatysty jeke baǵalar men pikirlerdi taratýdan bas tartýǵa asa nazar aýdaramyz, — delingen habarlamada.
Qazaqstannyń Túrkıadaǵy sheteldik ókildikteriniń jedel jeli telefondary:
1. Qazaqstan Respýblıkasynyń Ankaradaǵy Elshiligi: +905352734496
2. Qazaqstan Respýblıkasynyń Ystanbuldaǵy Bas konsýldyǵy: +905012621465
3. Qazaqstan Respýblıkasynyń Antalıadaǵy Bas konsýldyǵy: +905394400522
4. Qazaqstan Respýblıkasynyń Izmırdegi Bas konsýldyǵy: +905530998789
Aıta ketelik Túrkıadaǵy narazylyqtyń saıabyrsıtyn túri joq.