Sabaqtar T-72 jáne BMP-2 tanki shtattyq tehnıkasynyń túngi kórý qurylǵylaryn jóndeý boıynsha rota tehnıkteriniń mamandaryn daıarlaýdy kózdeıdi.
Kýrstyń baǵdarlamasy brondy tehnıkaǵa elektr qurylǵylaryn ornatý sheńberindegi bazalyq jalpy ınjenerlik daıyndyqty naqtylaıdy, dep habarlaıdy Almaty-akshamy.kz QR Qorǵanys mınıstrligine silteme jasap.
Kýrs osy jyldyń aqpan-naýryz aılary aralyǵynda Radıoelektronıka jáne baılanys áskerı-ınjenerlik ınstıtýtynyń bazasynda áskerı radıotehnıka jáne elektronıka negizderi kafedrasy bastyǵynyń orynbasary podpolkovnık Nurjan Zikiráevtiń basshylyǵymen ótkizilip jatyr. Bıyl QR Qarýly kúshteri Qurlyq áskerleriniń 42 áskerı qyzmetshisi bastapqy kýrstan ótedi.
Qurylystyń negizderi men prınsıpterin, jumys erekshelikterin, túngi kórý qurylǵylarynyń tıptik sqemalarynyń sıpattamalary men ólshemderin úırený, sonymen qatar aqaýlardy anyqtaý jáne joıýdy esepteý daǵdylary men praktıkalyq jumystardy qalyptastyrý kýrstyń negizgi maqsaty bolyp tabylady.
«Basty mindetimiz – ınjenerlik-tehnıkalyq qyzmet mamandaryn oqytý jáne joǵary sapaly kásibı daıarlyqqa qol jetkizý. Tájirıbelik daǵdylardy qalyptastyrýǵa da erekshe nazar aýdarylady», – dep atap ótti podpolkovnık N. Zikiráev.
Alǵashqy úsh toptaǵy 29 áskerı oqýyn aıaqtap úlgerdi. Naýryz aıynyń sońyna deıin taǵy birneshe top oqytylady.
Podpolkovnık Nurjan Zikiráev qarý-jaraq pen áskerı tehnıkadaǵy túnde kórýdi jaqsartatyn optıkalyq-elektrondyq júıeniń prototıpin ázirleýge qatysqanyn atap ótken jón. Júıe jaýyngerlik mashınanyń ekıpajyna tabıǵı jaryqty paıdalanbaı, qarańǵyda baqylaýǵa jáne qozǵalýǵa múmkindik beredi. Prototıpti brondalǵan dóńgelekti men shynjyr tabandy tehnıkada da qoldanýǵa bolady. Inovasıalyq júıe memlekettik polıgonda synaqtan ótti jáne Qazaqstan Qarýly kúshteriniń basqa da ázirlemeleri arasynda úzdik dep tanyldy.