Ulttyq ulan sapynda tek quqyqtyq tártip saqshylary ǵana emes, naǵyz chempıondar da bar.
Solardyń biri – Almaty qalasynda ornalasqan QR İİM Ulttyq ulanynyń 5571 áskerı bóliminde merzimdi qyzmetin atqaryp júrgen qatardaǵy jaýynger Aldıar Jarkeev, dep habarlaıdy aqshamnews.kz Polisia.kz-ke silteme jasap.
Ásker qataryna Jezqazǵan qalasynan shaqyrtylǵan Aldıar – Qazaqstannyń eki dúrkin chempıony. Onyń esimi qoıan-qoltyq urys áleminde jaqsy tanys. Ol alǵashqy úlken jeńisterine áskerge deıin qol jetkizgen. 2021 jyly Qaraǵandyda jeńil salmaq dárejesinde jeńimpaz atansa, 2023 jyly Astanada chempıondyq ataǵyn qorǵap shyqty.
Áskerdegi alǵashqy kúnderinen-aq komandırler onyń sporttyq áleýetin baıqady. Bıyl Túrkistan qalasynda ótken Ulttyq ulan áskerı qyzmetshileri arasyndaǵy sporttyq jáne jaýyngerlik sambodan ótken chempıonatta Aldıar "Ońtústik" ÓńQ komandasynyń namysyn qorǵap, 70-ten astam myqty sportshy qatysqan básekede 58 keli salmaq dárejesinde kúmis júldeni enshiledi. Bul jetistik kezdeısoq emes. Aldıardyń sportqa degen súıispenshilik pen jigerli minezi otbasynda qalyptasqan. Onyń aǵalary da kezinde Ulttyq ulan sapynda merzimdi áskerı boryshyn ótep, inisine laıyqty úlgi kórsetti. Alaıda ulandyqtyń áskerı qyzmeti tek sportpen shektelmeıdi.
Búginde ol Almaty kóshelerinde patrúldik qyzmet atqaryp, qoǵamdyq tártipti qadaǵalap, mádenı jáne sporttyq is-sharalarda azamattardyń qaýipsizdigin qamtamasyz etedi. Komandırleri onyń minsiz tártibi men bastamashyldyǵyn erekshe atap ótedi. Al qarýlastary Aldıardy sportta da, áskerı qyzmette de úlgi bolarlyq naǵyz ulandyq dep sanaıdy.
– Men úshin sport – ómir salty. Áskerde júrsem de, jattyǵýdy jalǵastyrýdamyn. Áskerdegi qyzmet daıyndyǵyma esh kedergi keltirmeı, qaıta tózimdi ári myqty bolýǵa kómektesedi, – deıdi ol.
Bul sózder negizgi oıdy aıshyqtap, Ulttyq ulandaǵy qyzmet – erlik mektebi ǵana emes, tulǵa retinde damýǵa jol ashatyn orta ekenin dáleldeıdi. Munda jaýyngerlerge senim artyp, olardyń talantyn ashýǵa jáne jetistikke jetýine qoldaý kórsetedi. Óıtkeni áskerı formanyń artynda jańa belesterdi baǵyndyrýǵa talpynǵan adam bar.
Aqparat kózi Polisia.kz saıtynda: https://polisia.kz/qazaqstannyng-eki-durkin-chempiony-ulttyq-ulan-qatarynda-qyzmet-etedi/