Mamandar osy baǵytta jasalatyn jumysty talqylady.
Qazaqstan Úkimeti memlekettik densaýlyq saqtaý qyzmetterin kórsetýdiń sapasyn, tıimdiligin, qoljetimdiligi men yńǵaılylyǵyn arttyrýdy kózdep otyr, dep habarlaıdy Almaty-akshamy.kz.
Osy maqsatta Densaýlyq saqtaý mınıstri Ajar Ǵınıat Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsınmen salany sıfrlandyrýdyń birqatar baǵyty boıynsha birlesken jobalardy iske asyrý máselelerin talqylady.
Jıynda pılottyq uıymdarda derekterdi jınaý men taldaýdyń jáne prosesterdi basqarýdyń jańa tehnologıalaryn engizý, medısınalyq beınelerdiń ortalyqtandyrylǵan qoımasyn qurý, sondaı-aq medısınalyq uıymdarda tolyq qaǵazsyz qujat aınalymyna tolyqqandy kóshý máseleleri saralandy. Birlesken jobalar klınıkalyq hattamalardy sıfrlaýdy, qajetsiz nysandar men talaptardan arylýdy kózdeıdi.
Mınıstrler medısınadaǵy komýnıkasıa arnalaryn keńeıtý taqyrybyn zerdelep, dári-dármek aınalymy, medısınalyq qyzmet jáne sanıtarlyq-epıdemıologıalyq baqylaý salalarynda avtomattandyrylǵan memlekettik baqylaý quraldaryn engizý aspektilerin egjeı-tegjeıli talqylady. Qazaqstandaǵy telemedısınany damytý jáne densaýlyqty qashyqtyqtan monıtorıńileýdi keńinen engizý mańyzy erekshe atap ótildi.
«Qos tarap Respýblıkalyq elektrondyq densaýlyq saqtaý ortalyǵyn SDIAÓM-ge berý jáne sıfrlyq densaýlyq saqtaý salasynda zańdy tulǵa mártebesin berý týraly sheshim boıynsha ortaq pikirge keldi. Bul sheshimniń artyqshylyǵy - densaýlyq saqtaý salasynda ortalyq aqparattyq hab qurý jáne memlekettik densaýlyq saqtaý qyzmetterin kórsetýdiń sapasyn, tıimdiligin, qoljetimdiligi men yńǵaılylyǵyn arttyrý», - delingen Densaýlyq saqtaý mınıstrliginiń habarlamasynda.
