Eldíń tarıhynda keıbír jandar bolady, solardyń esímí árqashan ūrpaq júregínde saqtalady. Solardyń bírí – qazaqtyń dańqty qyzy, Keńes Odaǵynyń Batyry Álıya Moldaǵūlova. Bıyl onyń 100 jyldyq mereıtoıy atalyp óttí. Almaty qalasynda ūıymdastyrylǵan «Álıya. Máńgílík erlík» atty kontsert-spektakl – tek óner keshí ǵana emes, júrekterge erlík pen batyrlyq ūyalatatyn ruhanı sabaq boldy.
Álıya jasyna qaramastan, elí úshín janyn qıǵan, qıyn sátte batyldyǵymen halyqty tańǵaldyrǵan. Onyń erlígí – tek sol dáuírdíń ǵana emes, búgíngí ūrpaq úshín de úlgí. Bízge kerek nárse – ūrpaqty otansúıgíshtíkke, namysqa tárbıeleu, ruhyn bıík ūstau. Sol sebeptí būl shara mańyzy jaǵynan ūmytylmas oqıǵa boldy.
Kesh barysynda Qazaqstannyń halyq ártísí Lıdıya Kaden ana beınesíndegí monologymen shynaıy óner kórsettí, ár sózdíń astarynda tereń oı jatyr. Halyqaralyq jáne respublıkalyq baıqaulardyń laureaty Almagúl Battalıeva batyr ruhyna arnalǵan «Álıya» ánímen júrekterdí díríldettí. Jas ártísterdíń teatrlandyrylǵan kórínísterí erlíktíń mánín kórkem tílmen jetkízdí.
Qazaq estradasynyń jūldyzy Rustem Nūrjígíttíń «Kestelí oramal» ání, Petropavl qalasynyń «Sensitive» bı teatrynyń ónerí keshtíń kórkín ashty. Sońynda «Alashūly» toby «Atameken» ánímen halyqqa súıíspenshílíktí, elge adaldyqty eske saldy.
Óner men oıdyń qosyndysy arqyly, būl shara bízge bír nársení taǵy eske saldy: erlík – máńgílík, batyrlyq – ūrpaqtyń júregínde saqtalatyn qazyna. Álıyanyń ómírí – el súıgen, namysymen erekshelengen adamnyń úlgísí. Sol úlgí ár júrekte óshpes sham bolyp jarqyrauy kerek.
«Alatau» dástúrlí óner teatrynyń
Ádebıet bólím basshysy
Aubakırova Inara