Jetisý oblysynda Bıken Rımova atyndaǵy drama teatryna akademıalyq mártebesi berilýine oraı saltanatty shara ótti, dep habarlaıdy aqshamnews.kz
Merekelik jıynǵa oblys ákimi Beıbit Isabaev, arnaıy kelgen qonaqtar - Qazaqstannyń halyq ártisteri Bolat Ábdilmanov, Lıdıa Kádenova, Dýlyǵa Aqmolda jáne basqa da elimizge belgili óner ıeleri, jergilikti teatr ujymy, zıaly qaýym ókilderi qatysty.
Aldymen teatr mańdaıshasyndaǵy jańarǵan ataý saltanatty túrde ashyldy. Munan soń jıyn teatr ǵımaratynyń ishinde jalǵasyp, qonaqtar Bıken Rımova bústine gúl shoqtaryn qoıdy.
Jetisýlyq teatr ujymyn qýanyshymen quttyqtaǵan oblys ákimi Beıbit Isabaev:
- Bıyl bizdiń Taldyqorǵan teatry úshin merekeli jyl boldy. Buǵan deıin qyrkúıek aıynda óner ordasynyń jarty ǵasyrlyq belesi men dástúrli «BIKEN FEST» halyqaralyq festıvalin qatar ótkizgen bolatynbyz. Ózderińiz bilesizder, Prezıdent Bıken Rımova drama teatry akademıalyq mártebe alýǵa laıyq dep óziniń oń baǵasyn berip, jaqsylyq eselenip, teatr sol ataqqa qol jetkizip otyr. Bul ataqqa ıe bolý búgingi ónerpazdardyń ǵana jetistigi emes, osy teatrda ter tógip, eńbek etken aldyńǵy tolqyn aǵa-apalarymyzdyń salyp ketken sara jolynyń jańa dańǵylǵa ulasýy dep bilemiz. Sonymen qatar bul beles Bıken Rımova atyndaǵy Akademıalyq drama teatrynyń jańa dáýiri, juldyzdy shaǵynyń bastaýy bolatynyna senemin.
Budan keıin Qazaqstannyń halyq ártisteri Almahan Kenjebekova, Bolat Ábdilmanov, atalmysh teatrdyń dırektory Erlik Jýasbek áriptesterine quttyqtaý tilekterin bildirdi.
Qazaqstannyń halyq ártisi Almahan Kenjebekova:
- Osy teatrdyń shymyldyǵyn tuńǵysh ashqan aktrısanyń birimin. Alǵash «Qozy Kórpesh-Baıan sulý» spektaklinde Qozynyń sheshesi Maqpaldyń rólin oınadym. Sodan beri elý jyldyń qalaı ótip ketkenin bilmeı de qaldyq. Árıne, ataq úshin eńbek etken joqpyz, biraq tózimniń, shalqar shabyttyń, tabandy eńbektiń arqasynda osyndaı dárejege abyroımen jetip otyrmyz. Sońǵy jyldardyń bederinde osy teatrda qyryq-elý jyl eńbek etken azamattarymyz ataq alyp, eńbeginiń jemisin kórip jatyr. Bul teatrdyń kógerip-kókteýine úles qosqan sol azamattardyń qaı-qaısynyń da joly - adal eńbektiń, ónerge qyzmet etýdiń qandaı bolatynyn kórsetetin ónegeli jol. Teatrdyń mártebesi ósip, ónerimiz jasaı bersin.
Qazaqstannyń halyq ártisi Bolat Ábdilmanov:
- «Árkimge óz týǵan jeri - Baǵdat shári» deıdi. Sondyqtan týǵan jerdiń qashanda jóni bólek. Taldyqorǵan teatrynyń ónerine osyndaı úlken baǵa berilip, abyroıǵa bólenip jatqanda qalaı qýanbaımyz, jaqsylyqty bólisýge arnaıy keldim. Jetisýǵa ár kelgen saıyn Taldyqorǵannyń kórkeıip, ósip kele jatqanyn, sharýa adamdarynyń qyzý eńbegin kórip, óz basym qýanyp qaıtamyn, óńirdiń rýhanıaty úshin de rızamyz. Teatr - shyn mánindegi bekzat óner. Qoǵamdy meıirimge, qurmet pen syılastyqqa tárbeleýde sahnanyń róli zor. Teatrdyń «akademıalyq» degen atty ardaqtaı biletin ujymynyń alar asýy áli de alda dep bilemin.
Merekelik sharanyń sońynan teatr ónerpazdary Ǵabıt Músirepovtiń «Qozy Kórpesh – Baıan sulý» pesasyn kórermen nazaryna usyndy.
Atap ótsek, Taldyqorǵan teatry 1975 jyly qurylyp, bıyl 50 jyldyǵy atalyp ótildi. Osy elý jylda óner ordasynyń repertýary 200-den astam qoıylymmen tolyǵyp, qazaq jáne shetel klasıkteriniń týyndylary kórermenderden laıyqty baǵasyn alǵan.
Eske salsaq, bıylǵy mádenıet salasy qyzmetkerleriniń kásibı merekesine arnalǵan saltanatty jıynda Memleket Basshysy Bıken Rımova atyndaǵy drama teatryna Akademıalyq mártebe berý týraly bastama kóterip, sonyń negizinde osy jyldyń 2 jeltoqsanynda Úkimettiń qaýlysy shyqqan bolatyn.