QR Prezıdenti janyndaǵy Ortalyq komýnıkasıalar qyzmetiniń baspasóz konferensıasynda Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov eldi mekenderdi aýyzsýmen qamtý jáne ınjenerlik jelilerdi jańǵyrtý jumystarynyń barysy týraly baıandady, dep habarlaıdy aqshamnews.kz.
Memleket basshysy Qasym-Jomart Toqaevtyń 2021 jylǵy 1 qyrkúıektegi Qazaqstan halqyna Joldaýynda bergen tapsyrmasyna sáıkes, 2025 jyldyń sońyna deıin barlyq qalalar men aýyldardy 100% sapaly aýyzsýmen qamtamasyz etý kózdelgen.
Búginde bul baǵyttaǵy jumystar qarqyndy júrgizilýde. Komıtet tóraǵasy Baqytjan Júnisbekovtiń aıtýynsha, sońǵy jyldary aýyzsýmen qamtý deńgeıi aıtarlyqtaı artqan. 2024 jyldyń qorytyndysy boıynsha, qalalarda halyqtyń 99,4%-y, al aýyldarda 97,8%-y ortalyqtandyrylǵan sý júıesine qosylǵan.
«Bul kórsetkishterge qol jetkizý úshin respýblıkalyq búdjetten 1 trln teńgeden astam qarajat bólindi. Ásirese halqy tyǵyz ornalasqan aýyldarǵa basymdyq berildi. Nátıjesinde 10 óńirdegi qalalar men Mańǵystaý oblysynyń aýyldary tolyqtaı aýyzsýmen qamtyldy», – atap ótti Komıtet tóraǵasy.
2025 jylǵa deıin bul kórsetkishti 100%-ǵa jetkizý úshin bıyl búdjetten qosymsha 176 mlrd teńge bólinip, 410 joba júzege asyrylady. Onyń ishinde qalalarda 89 jobaǵa 71 mlrd teńge, al aýyldarda 321 jobaǵa 106 mlrd teńge qarastyrylǵan.
Halqy az aýyldarda sýdy tıimdi jetkizý úshin shaǵyn sý tazartý modýlderi ornatylýda. Alaıda, keıbir aýyldarda turǵyndar jeke qudyqtary men uńǵymalary bar bolǵandyqtan, ortalyq sý júıesine qosylýdan bas tartýda. Osyǵan baılanysty jergilikti ákimdiktermen birlesip, sý sapasyn tekserý jumystary júrgizilýde», – dedi Baqytjan Júnisbekov.
Sý sapasynyń turaqty bolýy ınfraqurylymnyń tozý deńgeıine tikeleı baılanysty. Qazaqstan boıynsha sý qubyrlarynyń jalpy uzyndyǵy – 106,7 myń shaqyrym, olardyń tozý deńgeıi 39%-dy quraıdy.
Máseleni túbegeıli sheshý úshin «Energetıka jáne komýnaldyq sektordy jańǵyrtý» ulttyq jobasy qabyldandy. Bul joba aıasynda 10 myń shaqyrym jeli jańartylady. Onyń ishinde 5 myń shaqyrym sý qubyry jelileri jóndeýden ótedi.