Osy maqsatta áskerıler daıyndyq jumystaryn júrgizip jatyr.
Qazaqstandyq áskerıler Reseıde ótetin jarysqa daıyndalyp jatyr. Bul shara tamyzdyń 9 kúni Rázan qalasynda ótedi, dep habarlaıdy Almaty-akshamy.kz.
«Almatydaǵy desanttyq-shabýyldaý brıgadasynyń jáne Qurlyq áskerleri Áskerı ınstıtýtynyń polıgondarynda áskerı qyzmetshiler Armıalyq halyqaralyq oıyndar sheńberinde «Desanttyq vzvod» konkýrsyna qatysý úshin daıarlyqtan ótýde», – delingen Qorǵanys mınıstrliginiń baspasóz qyzmetiniń habarlamasynda.
Mamandardyń aıtýynsha, desantshylar jattyǵý qarqynyn údetýde. Bul rette áskerı qyzmetshiler oq atý daıarlyǵyn jetildirip, dene shynyqtyrý daıyndyǵyn arttyrýda.
«Daıarlyq josparǵa sáıkes eki kezeńde ótkizilýde. Birinshi kezeń barysynda biz oq atýdy júktemesiz oryndadyq. Al ekinshi kezeńde mınýtyna púls qarqyny 170 soqqyǵa deıin, sondaı-aq ártúrli qalypta dál kózdep oq atý pysyqtaldy», – dedi tankige qarsy qol granataatqyshynan oq atý jónindegi nusqaýshy maıor Sergeı Batýrın.
Onyń aıtýynsha, buryn ótkizilgen jarystarda jol berilgen qatelikter zerdelenip, sebepterine taldaý jasaldy. Olardy joıý boıynsha sharalar qabyldandy.
Nusqaýshylar jattyqtyrý barysynda tankige qarsy qol garanataatqyshynan oq atý kezinde efreıtor Dáýren Ahmetqalıdyń jaqsy nátıje kórsetkenin atap ótti. Áskerı qyzmetshi 150, 200, 250 metr qashyqtyqtaǵy jertasadan tankini ımıtasıalaıtyn nysanaǵa dál tıgizip joıady.
Konkýrs tórt kezeńnen turady. Olar desant túsirýdi, jerge qoný alańynda jınalýdy, 10 kılometr qashyqtyqqa marsh jasaýdy, jeke jarysty, oq atý kezinde jaýyngerlik mashınamen izge túsý jarysyn, sondaı-aq jaýyngerlik mashınalardaǵy estafetany qamtıdy.
Bıylǵy jyly Armıalyq halyqaralyq oıyndar 12 elde ótedi. Oıyndar baǵdarlamasy 34 konkýrstan turady. Olardyń ishinde ekeýi – «Artılerıadan oq atý sheberi» mınaatqyshtar eseptoptarynyń saıysy jáne «Suńqar ańshylyǵy» ushqyshsyz ushatyn apparattar eseptoptarynyń saıysy Qazaqstanda ótedi.
