M. Qozybaev atyndaǵy Soltústik Qazaqstan ýnıversıtetiniń stýdentteri osyndaı múmkindikke ıe boldy.
Bul atalmysh ýnıversıtetpen strategıalyq áriptestik sheńberinde iske asyrylady, dep habarlaıdy Almaty-akshamy.kz QR BǴM baspasóz qyzmetine silteme jasap.
Qazaqstandyq stýdentter elimizde oqýyn jalǵastyra otyryp, AQSH-tyń bedeldi joǵary oqý orny Arızona ýnıversıtetiniń dıplomyn ala alady.
Qazaqstandyq tarap Arızona ýnıversıtetiniń ókilderin shaqyrdy. Olar otandyq joǵary oqý oryndarynyń múmkindikteri men áleýetin zerdelep, áriptes retinde M. Qozybaev atyndaǵy Soltústik Qazaqstan ýnıversıtetin tańdady. Delegasıanyń Qazaqstanǵa sapary kezinde mınıstrlik pen ýnıversıtet arasynda memorandým jasaldy. Jýyrda yntymaqtastyqty nyǵaıtý úshin uıymdastyrý is-sharalary ótkiziletin bolady.
Jasalǵan kelisimder aıasynda otandyq ýnıversıtet eki ǵasyrdan astam tarıhy bar amerıkandyq joǵary oqý ornynyń tájirıbesin qoldanatyn bolady.
Amerıkalyq oqytýshylar qazaqstandyq áriptesterimen stýdentterdiń zertteý daǵdylaryn damytýǵa baǵyttalǵan oqytý tehnologıalarymen bólisedi.
Arızona ýnıversıteti qazaqstandyq joǵary oqý ornynyń stýdentteri men oqytýshylary úshin óziniń sıfrlyq kitaphanasy men bilim berý resýrstaryna qoljetimdilikti qamtamasyz etedi.
Sonymen qatar Arızona ýnıversıteti Soltústik Qazaqstan ýnıversıtetiniń stýdentterin birlesip oqytý úshin óz oqytýshylaryn jiberedi.
Sabaqtardy aǵylshyn tilinde ótkizý josparlanǵandyqtan, otandyq ýnıversıtette daıyndyq bólimi – foundation ashylady.
Túlekter birden eki ýnıversıtettiń dıplomyn alady.
«Jobada akademıalyq tehnologıalar transferi qarastyrylǵan. Atap aıtqanda, Arızona ýnıversıteti amerıkandyq akademıalyq standarttar boıynsha SQÝ oqytýshylary men stýdentteriniń áleýetin arttyrýmen aınalysatyn bolady. Qazaqstandyq jáne amerıkandyq ǵalymdar qatarynan birlesken ǵylymı toptar qurylady. Olar soltústik óńir úshin dástúrli agrotehnologıa jáne ınjenerlik tehnologıalar sıaqty baǵyttar boıynsha jumys isteıtin bolady. Arızona Ýnıversıtetinde eki ǵasyrdan astam tarıhy bar. Qazir Times (THE) reıtıńinde jetekshi orynda tur. Ýnıversıtet medısına, fızıka jáne astronomıa salasyndaǵy jetistikterimen tanymal. Qazirgi ýaqytta Arızona stýdentteri marstaǵy janartaýlar men aıdaǵy taýlardyń sýretterin jetkizetin teleskopty jasaýmen aınalysyp jatyr. Olar NASA-men tyǵyz jumys isteıdi. Birlesken yntymaqtastyqty nyǵaıtý sharalary joǵary bilim berý salasyna úlken serpilis beredi», – dep atap ótti M.Qozybaev atyndaǵy Soltústik Qazaqstan ýnıversıtetiniń Basqarma tóraǵasy – rektor Erlan Shýlanov.