Qazaqstannyń kúshtik qurylymdarynyń arnaıy bólinisteri Dýbaıda ótip jatqan "The UAE SWAT Challenge 2025" VI halyqaralyq jarystaryna qatysýda.
Týrnır 1-5 aqpan aralyǵynda ótedi. Jarysta álemniń túkpir-túkpirinen kelgen 100-den astam komanda baq synaýda, dep habarlaıdy aqshamnews.kz.
Qatysýshylar taktıkalyq jattyǵýlardy oryndap, kedergilerdi jeńip, shabýyldaý, joldastaryn qutqarý jáne munaralarǵa kóterilý sıaqty birqatar qıyn tapsyrmalardy eńserýi tıis.
Halyqaralyq arenada elimizdiń namysyn İshki ister mınıstrliginiń, Qorǵanys mınıstrliginiń, Ulttyq qaýipsizdik komıtetiniń jáne Memlekettik kúzet qyzmetiniń komandalary qorǵaýda.
Polısıa vedomstvosynan jarysqa "Suńqar", "Arlan", "Búrkit" jáne Jyldam qımyldaıtyn arnaıy jasaǵynyń komandalary qatysyp jatyr.
Qazaqstan úshin JQAJ-dan "Tomırıs" áıelder komandasynyń debúti erekshe mańyzǵa ıe. Bul qazaqstandyq tártip saqshylarynyń joǵary daıyndyǵyn kórsetedi.
Eki kúnniń qorytyndysy boıynsha týrnır kestesinde Qytaıdan kelgen jaýyngerler kósh bastap tur. Ekinshi orynda İİM-niń "Suńqar" komandasy, al úshinshi orynda MKQ-nyń "Sardar" komandasy.
- Alda taǵy da birqatar synaqtar bar. Jaýyngerlerimizge jeńis tileımiz! — dep atap ótti İİM.