Buıryq ázirlendi
Kómirdi Qazaqstannan tys jerlerge avtokólikpen shyǵarýǵa tyıym salatyn buıryq ázirlendi. Bul týraly QR Indýstrıa jáne ınfraqurylymdyq damý mınıstrligi Indýstrıalyq damý komıtetiniń tóraǵasy İlıas Ospanov aıtyp berdi, dep habarlaıdy Almaty-akshamy.kz QazAqparat-qa silteme jasap.
«Ótken jylytý maýsymynda kómirdi respýblıkadan tys jerlerge shyǵarý faktileri baıqaldy. Munda bırja arqyly usyný jolymen alatyn, halyq úshin arnaıy baǵa belgilengen kómir bar ekenin aıta keteıin. Biraq ótken jyly kómirdiń edáýir kólemi arnaıy baǵamen el aýmaǵynan tys ketkeni týraly faktiler anyqtaldy», - dedi İlıas Ospanov Ortalyq komýnıkasıalar qyzmetinde ótken baspasóz máslıhatynda.
Jambyl oblysy ákimdiginiń deregine sáıkes, ótken jyly «Aısha bıbi», «Sypataı batyr», «Qarasý» keden beketteri arqyly Qyrǵyzstanǵa shamamen 120 myń tonna kómir shyǵarylǵan.
«Kómirdi elden áketý áli de jalǵasýda. Merki aýdany turǵyndarynyń aqparaty boıynsha, kómir satý oryndarynda qatty otyndy áketýge daıyn 50-ge jýyq avtokólik tur. Bıyl osyndaı faktilerdi boldyrmaý úshin kómirdi avtokólikpen áketýge tyıym salatyn buıryq ázirledik. Biraq temirjol kóliginde esh shekteý joq. Biz shekaralas óńirlermen keńes ótkizdik», - dep naqtylady spıker.
Buǵan deıin İlıas Ospanov Qazaqstanda jylytý maýsymyna daıyndyq qalaı júrip jatqanyn aıtqan edi.
Sonymen birge Qazaqstanda kómir qymbattaýy múmkin.