«Qant áketýdiń keıbir máseleleri týraly» Qazaqstan Respýblıkasy Aýyl sharýashylyǵy mınıstriniń 2024 jylǵy 11 maýsymdaǵy № 196 buıryǵymen 2024 jylǵy 31 tamyzǵa deıin el aýmaǵynan, onyń ishinde Eýrazıalyq ekonomıkalyq odaqqa múshe memleketterge qant áketýge ýaqytsha shekteý engizildi.
Shekteý QR aýmaǵy arqyly halyqaralyq qant tranzıtine, sondaı-aq Qazaqstan Respýblıkasynyń aýmaǵy arqyly Eýrazıalyq ekonomıkalyq odaqqa múshe bir memlekettiń aýmaǵynan Eýrazıalyq ekonomıkalyq odaqqa múshe basqa memlekettiń aýmaǵyna qant tasymaldaýǵa qatysty qoldanylmaıdy.
Buıryq 2024 jylǵy 14 maýsymnan bastap kúshine endi, dep habarlaıdy Almaty-akshamy.kz.
Qant shyǵarýǵa ýaqytsha shekteý sharalaryn belgileý týraly sheshim Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komısıada 2024 jylǵy 6 mamyrda qabyldandy.
Aıta keteıik, jazǵy kezeńde ishki naryqta qant tutynýdyń halyq tarapynan da, ındýstrıalyq tutynýshylar tarapynan da ósýi baıqalady. Osyǵan baılanysty, qant áketýge ýaqytsha tyıym salý ishki naryqty qamtamasyz etý jáne onyń keri eksportyn boldyrmaý maqsatynda engizildi.
Tutastaı alǵanda, qazirgi ýaqytta eldegi qant qory qant qyzylshasynyń jańa ónimi bastalǵanǵa deıin qantqa degen suranysty qamtamasyz etý úshin jetkilikti.
Budan bólek, otandyq qant zaýyttary qant óndirý úshin úshinshi elderden qamys shıkizatyn ákelýdi júzege asyrady.
Qazirgi ýaqytta Mınıstrlik ónerkásiptik qaıta óńdeý úshin shıki qantty bajsyz ákelýge ótinimder qabyldaýdy jalǵastyrýda.
Esterińizge sala keteıik, EEK aıasynda Qazaqstan Respýblıkasy úshin aǵymdaǵy jyly 300 myń tonna kóleminde shıki qant bajsyz ákelýge kvota kelisildi.