2024 jylǵy 1 maýsymdaǵy jaǵdaı boıynsha «Alǵashqy jumys orny» jobasyn iske asyrý sheńberinde 4,2 myń adam jumysqa ornalastyryldy.
2024 jyly osy baǵyt boıynsha barlyǵy 8,7 myń adamdy jumysqa ornalastyrý josparlanýda, dep habarlaıdy Almaty-akshamy.kz.
«Alǵashqy jumys orny» jobasy boıynsha jumysqa ornalasqandardyń eń kóp sany Túrkistan oblysynda – 1,3 myń adam, Shymkent qalasynda – 1,1 myń adam, Almaty oblysynda – 302 adam jáne Jambyl oblysynda – 264 adam tirkeldi. Jobaǵa qatysatyn áıel azamattar úlesi 59,1% nemese 2,6 myń adamdy, aýyl turǵyndarynyń úlesi 2,3 myń adamdy nemese 52,9% quraıdy.
Bul jobaǵa jumys tájirıbesi joq 35 jastan aspaǵan jumyssyz azamattar qatysa alady. Ol úshin Mansap ortalyǵyna ótinish berý kerek.
Oqý oryndarynyń túlekteri úshin «Alǵashqy jumys orny» jobasy boıynsha jumys oryndary olar alǵan kásip (mamandyq) nemese baılanysty kásip (mamandyq) boıynsha qurylady.
«Alǵashqy jumys orny» jobasyn qarjylandyrýdy Eńbek mobıldiligi ortalyǵy jumys berýshi usynǵan aı saıynǵy málimetter negizinde júzege asyrady.
Jalaqyny sýbsıdıalaý merzimi 18 aıdan aspaıdy, sýbsıdıa mólsheri 30 AEK-ti quraıdy.
«Alǵashqy jumys orny» jobasyna qatysý merzimi aıaqtalǵannan keıin jumys berýshi jumyssyzdardy keminde 12 aı merzimmen turaqty jumys ornyna ornalastyrýǵa mindetti.
Jobaǵa qatysýshylardyń biri Mádına Baıjanova, ol osy jyldyń basynda «Aqsý qalasynyń №2 bóbekjaıy» KMQK-da 18 aı merzimge tárbıeshi bolyp jumysqa ornalasty.
«Árbir túlek oqý ornyn bitirgennen keıin óz mamandyǵy boıynsha jumys istegisi keletini anyq, Men de solardyń qatarynda bodym. Kolejdi «Mektepke deıingi uıymdardyń tárbıeshisi» mamandyǵy boıynsha támamdap, jumys izdep Pavlodar oblysy Aqsý qalasynyń Mansap ortalyǵyna júgindim.
Ulttyq biliktilik testileý sertıfıkaty men jumys tájirıbesiniń bolmaýyna baılanysty turaqty jumys ornyna jumysqa ornalasý qıynǵa soqty. Jumyssyz retinde tirkelgennen keıin Mansap ortalyǵynyń mamandary maǵan qolaıly bos jumys oryndaryn usyna bastady. Berilgen baǵyt boıynsha áńgimelesý ótti jáne búgingi kúni munda tárbıeshi bolyp jumys isteımin», – dedi jas maman.
Pavlodar oblysynda 2024 jyly «Alǵashqy jumys orny» jobasy boıynsha 299 adamdy jumysqa ornalastyrý josparlanýda.