Týrızm jáne sport mınıstri Ermek Marjyqpaev Majarstan astanasy Býdapeshtte ótken WKF karateden álem chempıonatynda elimizdiń Kók Týyn bıikte jelbiretip, Qazaqstanǵa tarıhı altyn júldeni syılaǵan Móldir Jańbyrbaı men álem birinshiliginiń qola júldegeri Dıdar Ámirálini qabyldap, Prezıdenttiń arnaıy alǵys hatyn tabystady, dep habarlaıdy Almaty-akshamy.kz.
Týrızm jáne sport mınıstrligi saıtynyń málimetinshe, kezdesý barysynda mınıstr sportshylardyń álem chempıonatyndaǵy jetistikterin joǵary baǵalap, aldaǵy ýaqytta da el namysy synalatyn mańyzdy týrnırlerde tabysty óner kórsetýine tilekshi ekenin jetkizdi.
«Keıingi jyldary elimizde karate sporty qarqyndy damyp kele jatyr. Buǵan sizderdiń qosyp júrgen úlesterińiz orasan zor. Jýyqta Qytaıdyń Hanchjoý qalasynda uıymdastyrylǵan Jazǵy Azıa oıyndarynda ekeýińiz de júldegerler qatarynan kórinip, jankúıerlerdi qýanysh pen shattyqqa bóledińizder. Endi mine, arada kóp ýaqyt ótpeı álem birinshiliginde de tuǵyrdyń eń bıik satysynan kórindińizder. Sizderge aldaǵy ýaqytta da el namysy synalatyn mańyzdy týrnırlerde tabys tileımin», - dedi Ermek Marjyqpaev.
Aıta keteıik, Majarstandaǵy álem chempıonatynyń fınalynda Móldir Jańbyrbaı (50 kg) ıtalıalyq Ermınıa Perfettoǵa esh múmkindik bermeı, altyn tuǵyrǵa kóterilse, 67 kg-ǵa deıingi salmaqta el namysyn qorǵaǵan Dıdar Ámiráli úshinshi oryn úshin ótken básekede Iordanıa sportshysy Afıf Gaıtti jeńip, qola medalǵa qol jetkizgen-di.