«Maqsatty kapıtal qorlary týraly» zań jobasy daıyndaldy.
Bul týraly L. N. Gýmılev atyndaǵy Eýrazıa ulttyq ýnıversıteti uıymdastyrǵan III halyqaralyq endaýmentter konferensıasyna qatysýshylar málimdedi, dep habarlaıdy Almaty-akshamy.kz.
QR Ǵylym jáne joǵary bilim mınıstrliginiń málimetinshe, forým memlekettik organdardyń, maqsatty kapıtal jáne qarjy sektory qorlarynyń, endaýment qorlardyń jáne Qazaqstan, Reseı, Qyrǵyzstan, Ózbekstan, Tájikstan joǵary oqý oryndarynyń ókilderin biriktirdi.
Jıynǵa qatysýshylar Qazaqstandaǵy endaýment qorlardyń búgingi ahýaly men damý basymdyqtaryn, olardyń qyzmetin qoldaý men retteýdegi memlekettik organdardyń rólin, endaýment aktıvterin basqarýdaǵy ınovasıalar men tehnologıalardy talqylady ári TMD elderindegi endaýment tájirıbesin qarastyrdy.
Forým barysynda EUÝ rektory Erlan Sydyqov endaýmenttiń bilim berý mekemeleriniń turaqtylyǵy men básekege qabilettiligin qamtamasyz etýdegi negizgi róline toqtaldy. Akademık ýnıversıtet 2022 jyly ótkizgen «Qazaqstannyń endaýmentteri» birinshi forýmy endaýment qorlarynyń qyzmetine qajetti normatıvtik-quqyqtyq bazany ázirleýdiń negizine aınalǵanyn atap ótti.
QR Ǵylym jáne joǵary bilim mınıstriniń keńesshisi Farhad Qýanǵanov Eýrazıa ulttyq ýnıversıteti Qazaqstandaǵy endaýment qorlary qozǵalysynyń alǵashqy bastamashysy bolǵanyn atap ótti. Onyń aıtýynsha, zań jobasyn daıyndaý kezinde endaýment qorlary qurylǵan barlyq elderdiń halyqaralyq tájirıbesi zerdelengen.
«Bir jyl buryn konferensıaǵa qatysýshylar usynystar daıyndap, endaýment qorlary týraly jeke zań ázirleýdi usyndy. Búginde bul másele praktıkalyq deńgeıge kóshti. Jeke zań jobasyn qabyldaý qajettiligi qazirgi zańnamada endaýment qorlaryna áleýetti salymshylardy yntalandyrý, durys ınvestısıalaý jáne salymshylar qarajatynyń jumsalýyn baqylaý boıynsha normalardyń joqtyǵynan týyndap otyr. Tabysty endaýment qorlary bar barlyq elderde tárizdi jeke zań qajet. Qazaqstanda endaýment qorlary zańdy tulǵany korporatıvtik, ınvestısıalyq nemese basqa da qor túrinde tirkeýge májbúr, bul qaıyrymdylyq týraly zańda kózdelgen qyzmetti qıyndatady jáne salyqtyq daýlar týdyrady. Zań jobasynyń qurylymy Qazaqstan zańnamasynyń talaptaryna sáıkes jasalǵan. Ony ázirleý kezinde endaýment qorlary týraly qolda bar normalardy saqtaýǵa jáne barynsha paıdalanýǵa tyrystyq», - dep túsindirdi spıker.
Qazaqstan qarjygerleri qaýymdastyǵynyń basqarýshy dırektory Erlan Býrabaev qarjy naryǵy Qazaqstannyń endaýment-qorlar júıesin qurýǵa bıyl ǵana belsendi túrde qatysqanyn atap ótti.
«Biz Qazaqstandaǵy endaýment qorlardy damytý boıynsha usynystardy qyzyǵýshylyqpen qabaldadyq. Árıne, qarjy naryǵy ekonomıkadaǵy kapıtaldy qaıta bólýmen aınalysatyn júıe retinde endaýment qorlarynda qalyptasatyn aqshanyń ekonomıka úshin uzaq merzimdi ekendigine qyzyǵýshylyq tanytady. Bul - qarjy naryǵy úshin eń mańyzdy element», - dep tolyqtyrdy qarjyger.
Konferensıa qorytyndysy boıynsha rezolúsıa qabyldandy. Onyń aıasynda qatysýshylar ádistemelerdi standarttaý jáne úzdiksiz bilim alý men dıalog alańyn qamtamasyz etý úshin Qazaqstan qorlarynyń qaýymdastyǵyn qurý týraly sheshim qabyldady. «Maqsatty kapıtal qorlary (endaýment qorlary) týraly» QR Zańynyń jobasyna da sarapshylar oń baǵasyn berdi.
Aıta keteıik, ENU Endowment Fund qoryn L.N.Gýmılev atyndaǵy Eýrazıa ulttyq ýnıversıtetiniń túlekteri qurǵan. Qordyń maqsatty kapıtalyna qol suǵylmaıdy jáne ol jınaqtaýshy sıpatqa ıe. Qarjylandyrý tek odan túsken ınvestısıalyq kiris esebinen júzege asyrylady. Endaýment qorynyń quryltaıshylary daryndy jáne muqtaj stýdentterge qoldaý kórsetedi, stýdentterdiń ǵylymı, ınovasıalyq jáne kásipkerlik qyzmetin yntalandyrady. Qazirdiń ózinde 30-ǵa jýyq stýdent ENU Endowment Fund qorynyń ataýly jeke granttar men shákirtaqylarǵa ıe boldy.