Áleýmettik jelilerde Qazaqstan aýmaǵyna ákelingen avtokólikti kedendik tazartýdan ótkizý úshin kedendik baj stavkasy ulǵaıdy degen aqparat tarap jatyr. Memlekettik kirister komıteti bul aqparatty resmı túrde joqqa shyǵarady.
Keden bajynyń stavkasyn Eýrazıa ekonomıkalyq komısıasy belgileıdi (EEK Keńesiniń 2021 jylǵy 14 qyrkúıektegi № 80 sheshimi) jáne bul stavka Qazaqstan Respýblıkasy úshin mindetti bolyp tabylady. «Jeńil avtokólikterge arnalǵan baj stavkasy 2022 jyly ózgerissiz qaldy, dep habarlaıdy Almaty-akshamy.kz
Kerisinshe, Eýrazıalyq ekonomıkalyq odaq Keńesiniń 2022 jylǵy 17 naýryzdaǵy № 39 sheshimimen tıisti qujattar usynylǵan jaǵdaıda elektromobılderdi baj mólsherlemesiniń 15%-ynan bosatý túrindegi jeńildik berildi.
Usynylatyn qujat túrin Indýstrıa jáne ınfraqurylymdyq damý mınıstrligi belgileıdi. 2022 jylǵy 5 sáýirdegi № 46 sheshimimen daıyn ónimdi óndirýge arnalǵan shıkizat jáne materıaldar sıaqty «sezimtal» taýarlardyń jekelegen sanattaryna kedendik ákelý bajynyń 0% mólsherlemesi engizildi», - delingen Komıtet habarlamasynda.
Sonymen qatar, taýarlardyń kedendik quny EAEO Keden kodeksiniń 5-taraýyna (taýarlardyń kedendik qunyn aıqyndaýdyń alty ádisi) jáne Eýrazıa ekonomıkalyq komısıa alqasynyń 2018 jylǵy 27 naýryzdaǵy № 42 sheshimine sáıkes aıqyndalady.
Avtokólik satyp alý kezinde azamattar aýmaqtyq memlekettik kirister departamentterine baryp, kedendik tazartýdan ótkizgeni jón. Zańsyz is-áreketter faktileri jáne shaǵymdaný úshin basqa da negizder bolǵan jaǵdaıda, 14-14 qysqa nómirine nemese 8-7172-71-81-71 nómirine habarlaýǵa bolady. Sonymen qatar, ýtılızasıalyq alym men kedendik baj bir-birine uqsamaıtyn eki bólek alym jáne bir-birin almastyra almaıtynyn eskerý qajet.
Qazaqstan Respýblıkasyndaǵy tarıftik saıasat sharalary - Saýda jáne ıntegrasıa mınıstrliginiń quzyretine, al ýtılızasıalyq alym mólsherlemesin bekitý - Indýstrıa jáne ınfraqurylymdyq damý mınıstrliginiń quzyretine jatady.