Byltyr qazaqstandyqtar sıfrlyq qujattardy 32 mln ret paıdalanǵan.
Bul týraly Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Májilistiń jalpy otyrysynda aıtty, dep habarlaıdy Almaty-akshamy.kz QazAqparatqa silteme jasap.
«Byltyr el turǵyndary sıfrlyq qujattardy 32 mln ret paıdalansa, 2020 jyly nebary 3,6 mln ret qoldanylǵan. Zań jobasynda elektrondyq qujattardy qaǵaz túrindegi balamasymen teń dárejeli etip zańdastyrý, elektrondyq qujattardy tolyqqandy qoldanýǵa kedergi keltiretin zańdardaǵy qaıshylyqtar men ártúrli oqylymdardy alyp tastaý jáne sıfrlyq qujattardyń qoldanylý aıasyn keńeıtý kózdelgen», - dedi Baǵdat Mýsın.
Onyń málimetinshe, zań jobasynda týý, neke qıý jáne nekeni buzý týraly kýálikter sıaqty azamattyq hal aktilerin memlekettik tirkeý jónindegi qujattardy elektrondyq formatqa aýystyrý qarastyrylǵan.
«Bul azamattar úshin yńǵaıly bolmaq, óıtkeni mekemelerge barý mindetinen bosatylady, azamat kez kelgen ýaqytta qujatty basyp shyǵara alady nemese QR-kody bar elektrondyq nusqasyn usynady. Onyń ústine, qujatty joǵaltyp alsa, telnusqa jasatý qajet emes. Azamat ózi qalasa nemese shetelge ketken jaǵdaıda qujatty qaǵazǵa basyp shyǵara alatyn bolady», - dedi mınıstr.
Aıta keteıik, búgingi Májilistiń jalpy otyrysynda Aıdos Sarym Májilistiń Halyqaralyq ister, qorǵanys jáne qaýipsizdik komıtetine aýysty.