10%-dyq ótemaqyny alý úshin jyl sońyna deıin ótinish berý qajet.
Qazaqstanda 5 mıllıonnan astam salymshy teńgedegi depozıtter boıynsha 10 paıyzdyq ótemaqy ala alady, dep habarlaıdy Almaty-akshamy.kz
Qazaqstandyq bankter jeke tulǵalardyń 2022 jylǵy 23 aqpandy qosa alǵanda ashylǵan teńgedegi depozıtteri boıynsha 10% ótemaqy (syılyqaqy) tóleýge ótinim qabyldaýdy jalǵastyryp jatyr.
Qazaqstannyń depozıtterge kepildik berý qorynyń aqparatynsha, 1 qyrkúıektegi jaǵdaı boıynsha 5 mıllıonnan astam salymshynyń depozıtine ótemaqy beriledi. Onyń ishinde salymshylardyń 97%-inde depozıt mólsheri –5 mln teńgege deıin, basym bóligi (86%) 1 mln teńgege deıingi depozıtti quraıdy.
«Biz salymshylardy ótemaqy alý múmkindigin paıdalanýǵa shaqyramyz. Eger sizde 2022 jyldyń 23 aqpanyna deıin depozıt ashylǵan bolsa, sizdiń bul syılyqaqyny alýǵa quqyǵyńyz bar. Ótemaqy alý úshin depozıttiń shekti somasy 20 mln teńge bolǵanymen, statısıka kórsetkendeı, ótemaqyǵa, negizinen, 1 mln teńgege deıingi depozıtter iligip jatyr», - dedi QDKBQ tóraǵasy Ádil Ótembaev.
Ótemaqy alý úshin salymshy 2023 jyldyń 1 qańtaryna deıin ótinish berý arqyly kelisimin rastaýy kerek. Keıbir bankterde tólemge onlaın ótinish berý múmkindigi bar.
Bankter ótemaqynyń ózin 2023 jyldyń 23 aqpanynan keıin aýdara bastaıdy.
Aıta keteri, ótemaqy jınaq, merzimdi, merzimsiz, sondaı-aq bilim berý jınaqtaý salymdary men turǵyn úı qurylys jınaqtary júıesindegi depozıtterge beriledi.