Bes kúnde qazaqstandyqtar Abaı oblysynyń turǵyndary úshin 165 mıllıon teńge jınady.
Kaspi.kz nıet bildirgenderdiń barlyǵy órtten zardap shekkenderge kómektese alýy úshin Ulttyq volonterlik jelimen birge onlaın, mobıldi qosymsha arqyly tez arada qarajat jınaýǵa múmkindik jasady, dep habarlaıdy Almaty-akshamy.kz
Kaspi.kz óz tarapynan órtten zardap shekkender úshin 35 mıllıon teńge qosyp, somany 200 mıllıon teńgege deıin ulǵaıtty.
"Biz mundaı úlken rezonansty kútken de joqpyz. Qaıyrymdylyq kólemi ártúrli boldy. Bireý "Ulymnan" dep 50 teńge aýdarsa, bireý qomaqty soma jibergen. Qarajattyń bir bóligin órt sóndirýshilerdi, qutqarýshylardy qoldaýǵa, azyq-túlik pen qajetti zattardy satyp alýǵa bólemiz. Taǵy bir bóligi – zardap shekkenderdiń otbasylaryna kómek kórsetýge. Qalǵan somaǵa jábirlenýshilerdiń kámeletke tolmaǵan balalaryna depozıt ashýdy josparlap otyrmyz. Bul segiz bala kámeletke tolǵan soń aqshany oqýǵa, turǵyn úı jaǵdaıyn jaqsartýǵa nemese basqa da mańyzdy maqsattarǵa jumsaı alady. Ún qosyp, kómekteskenderdiń barlyǵyna rahmet!", dedi "Ulttyq volonterlik jeli" ZTB atqarýshy dırektory Tatána Mıronúk.
Kaspi.kz basshysy jáne negizin qalaýshylardyń biri Mıhaıl Lomtadze bank klıentterine alǵysyn aıtty.
"Qıyndyqqa tap bolǵan adamdardy qoldaý týraly sheshim qabyldaǵan barlyq súıikti, qamqor klıentterimizge rahmet. Kaspi qıyn jaǵdaıda qazaqstandyqtarǵa árqashan kómektesedi jáne shette qalmaıdy. Qaza tapqandardyń otbasylaryna kóńil aıtamyz jáne órt saldarynan zardap shekkenderdiń barlyǵynyń qaıǵysyna ortaqpyz", dedi Mıhaıl Lomtadze.