Qazaqstannan qajylyqqa baratyn adamdardy tasymaldaıtyn áýe kompanıalary anyqtaldy.
Qajylarymyzǵa qolaıly jaǵdaı jasaý maqsatynda QMDB qazaqstandyq jáne sheteldik áýekompanıalar arasynda 4000 qajyny tasymaldaý úshin ashyq konkýrs jarıalaǵan bolatyn, dep habarlaıdy Almaty-akshamy.kz.
Muftyat.kz-tiń málimeti boıynsha, konkýrsqa Kýveıttiń «Jazeera», Birikken Arab Ámirliginiń «Air Arabia», Túrkıanyń «Turkish Airlines», sondaı-aq Saýd Arabıasynyń «Flynas» áýe kompanıalary qyzyǵýshylyq bildirip, tıisti qujattaryn ótkizdi.
Osy rette, qajylyq oryndaryn alǵan 18 qazaqstandyq týroperator arasynan arnaıy komısıa qurylyp, atalǵan áýe kompanıalar ókilderimen tıisti kelissózder júrgizildi.
Básekelestikke túsken «Flynas» áýe kompanıasy da kelissózder nátıjesinde arzan baǵa usyndy. Atalmysh komısıa músheleri 3 áýe kompanıasyn tańdap aldy. Atap aıtqanda, tikeleı reısteri arqyly qajylarymyzdyń qasıetti mekenge jyldam jetýi úshin «Flynas» áýe kompanıasy tańdaldy. Al, arzan áýe bıletin qalaǵan týroperatorlar úshin «Jazeera» áýe kompanıasy qyzmet kórsetetin boldy. Álemniń ozyq úlgide qyzmet kórsetetin áýe kompanıalarynyń qataryna kiretin «Turkish Airlines» áýe kompanıasy jaılylyqty qalaǵan qajylarymyz úshin tańdaldy.
QMDB áýe kompanıalary arasyndaǵy konkýrs pen bıylǵy 4000 qazaqstandyq qajyny tasymaldaıtyn áýe kompanıalarynyń tańdalǵandyǵy jaıly Saýd Arabıa Koroldiginiń Qajylyq jáne umra mınıstrligi men Koróldiktiń Azamattyq avıasıa Bas basqarmasy tarapyna dıplomatıalyq arnalar arqyly resmı habarlanǵan bolatyn.
Qazaqstan tarapynan «Qajylyq-2023» maýsymyn uıymdastyrý boıynsha arnaıy issaparmen barǵan Qazaqstan musylmandary dinı basqarmasynyń tóraǵa orynbasary, naıb múftı Ershat Ońǵar men Qazaqstannyń Jıdda qalasyndaǵy Bas konsýly Qospanov Rýslan Tobyluly, al, Saýdıa tarapynan Koroldiktiń Azamattyq avıasıa Bas basqarmasynyń (GACA) Qajylyq jáne umra isteri boıynsha basqarma basshysy Mazen Ahmad Bazhaır myrza qatysqan kelissózder júrgizildi.
Kelissóz barysynda qazaqstandyq 18 týroperatormen qajylyqqa attanatyn 4000 otandasymyzdy QMDB ótkizgen konkýrs negizinde saýdıalyq «Flynas», kýveıttik «Jazeera», túrkıalyq «Turkish Airlines» áýe kompanıalary tasymaldaıtyny pysyqtaldy. Qajylarymyz Astana, Almaty, Túrkistan jáne Aqtaý qalalarynan ushaqqa otyryp, Mekke (Jıdda) jáne Medıne qalalaryna jetkiziletin bolady.