2008 jyldan beri mamandar 60 myń naýqasty emdep, 40 myńnan astam ota jasaǵan.
Qazaqstannyń barlyq óńiriniń turǵyndary Astanadaǵy Ulttyq neırohırýrgıa ortalyǵynda quny mıllılon teńgeden asatyn joǵary tehnologıalyq otalardy tegin jasata alady, dep habarlaıdy Almaty-akshamy.kz
Ortalyqtyń medısınalyq dırektory Asylbek Qalıev qazaqstandyqtardyń joǵary sanattaǵy dárigerlerge qalaı emdele alatynyn túsindirdi.
«15 jylda elimizde buryn-sondy qoldanylmaǵan 70-ten astam joǵary tehnologıa engizildi. Buryn naýqastarǵa ota jasatý úshin shetelge barýǵa týra keletin. Osy ortalyq ashylǵannan keıin medısınalyq kómek qoljetimdi boldy. Qazirgi kezde naýqastardyń neırohırýrgıa boıynsha joǵary tehnologıalyq emdi tegin alýǵa múmkindigi bar. Salystyrmaly túrde Eýropa, AQSH elderimen salystyrsaq, bizde emdelý 10-20 ese arzan», dedi ol.
Sondaı-aq byltyr ulttyq ortalyqta memlekettik-áleýmettik medısınalyq saqtandyrý boıynsha 4 myńnan astam pasıent emdelgenin atap ótti. Onyń 15 paıyzy joǵary tehnologıalyq medısınalyq qyzmetterdi qoldana otyryp jasalǵan otalar. Bıylǵy jyldyń 5 aıynda ortalyqqa medsaqtandyrý boıynsha 1805 naýqas emdeldi. Atap aıtqanda mı tamyrlary, omyrtqalardyń aýrýlary, stereotaktıkalyq júıkeni qoldana otyryp mıdyń neırostımýlátoryn ımplantasıalaý, Parkınson aýrýy, epılepsıa jáne t.b. aýrý túrleri.
«Biz Densaýlyq mınıstrligine baǵynyshty memlekettik mekeme sanalamyz. Jeke menshik klınıka emespiz. Bálkim aksıonerlik qoǵam bolǵan soń ba, kóbi bizdiń ortalyqty jekemenshik dep oılaıdy. Ortalyqta emdelý úshin naýqastar aldymen óz betimen konsýltasıaǵa kelip, kómek ala alady. Eger naýqasty ortalyqqa jatqyzýǵa sebepter bolsa, dáriger qorytyndy berip, jatqyzylatyn kúnin belgileıdi. Elimizdiń óńirlerinde turatyn naýqastar úshin onlaın konsýltasıa beretin arnaıy bólim jumys isteıdi. Oǵan 6 myńnan astam adam júginedi, profıline baılanysty aqparatty bólimshelerge bóledi. Eger sebepteri bolsa, ortalyqqa jatqyzýǵa qorytyndy beriledi. Naýqas ol qorytyndyny alǵan soń, turǵylyqty jeri boıynsha emhanaǵa baryp, qujattary portalǵa qoıylady. Jatqyzý kúni avtomatty túrde belgilenedi. Bul adamı faktordy boldyrmaý maqsatynda jasaldy. Portalǵa qoıylǵan qujattar qabyldanǵan soń, belgilengen kúni naýqas Astanaǵa keledi», - dep tolyqtyrdy sózin Asylbek Qalıev.
Sonymen qatar, ol neırohırýrgıalyq ortalyqta emdeletin naýqastardyń jasaryp kele jatqanyna alańdaýshylyq bildirdi.
«Buryn arterıalardyń tarylýy dıagnozy 70 ten asqan azamattarda kezdesetin. Qazir 20-25 jasta qaterlik isikpen kelip jatqandar bar. Taıaýda ǵana 1973 jyly týǵan azamat arterıalardyń tarylýy dıagnozymen em qabyldap ketti. Onyń faktorlary óte kóp. Meniń oıymsha ómir súrý daǵdysy, ekologıalyq faktor ról atqarýy múmkin. Sondaı-aq dıagnostıkanyń qoljetimdiligi de mańyzdy. 20 jyl buryn joǵary tehnologıalyq dıagnostıkany jasaý múmkin bolmaıtyn. Qazir kez kelgen adam baryp KT men MRT jasaı alady», - dedi dáriger.
Onyń aıtýynsha, qazaqstandyqtar ortalyq kórsetetin barlyq emdeý qyzmetterin tegin ala alady. Ol úshin medısınalyq saqtandyrý júıesine qatysýy kerek.
«Bizdiń ortalyq Qazaqstan azamattaryna MÁSM sheńberinde tegin qyzmet kórsetedi. Tek ol azamat medısınalyq saqtandyrý júıesine qatysýy kerek. Ózi-ózi jumyspen qamtýshy azamattyń medısınalyq saqtandyrý júıesine tólep otyrǵan somasy onyń alatyn qyzmetiniń qunymen salystyrǵanda óte tómen. Máselen, mı tamyryna jasalatyn otanyń bir túriniń quny bir naýqas úshin 4-6 mln teńgeniń aralyǵynda turady. Aı saıyn 3 myńnan sál asatyn somany tólep, qazaqstandyqtar quny birneshe mıllıon turatyn joǵary tehnologıalyq otany jasatýǵa bolady. Sol sıaqty gamma pyshaq tehnologıasy boıynsha ota sheteldikter úshin 1,5 mln teńge tursa, MÁMS júıesine qatysatyn qazaqstandyqtar úshin ol tegin», - dep qosty Qalıev.
Áleýmettik medısınalyq saqtandyrý qorynyń zańdy jáne jeke tulǵalarmen jumys departamentiniń dırektory Zabıra Orazalıevanyń elimizde joǵary tehnologıalyq operasıalardyń quny qymbat turatynyn atap ótti.
MÁMS-ke qatysyp, saqtandyrylǵan mártebesi bar kez kelgen azamattyń ózi tirkelgen emhanadan joldama alyp, josparly túrde portal arqyly emdelýine múmkindik bar. Jalpy joǵary tehnologıalyq operasıalar óte qymbat bolyp tabylady. Byltyrǵy jyldyń statısıkasyn qaraıtyn bolsaq, 2 myńǵa jýyq joǵary tehnologıalyq medısınalyq kómek kórsetilgen. Onyń 1,5 myńy MÁMS arqyly jasalyp otyr. Bıyl 500-ge jýyq mundaı kómek kórsetildi, onyń 400 saqtandyrý júıesinde kórsetildi, - dedi ol.
Jalpy, 2022 jyly elimizdegi táýlik boıy jumys isteıtin stasıonarlarda qazaqstandyqtar 452,5 mlrd teńgege 1,9 mln jaǵdaı boıynsha emdelgen. Onyń ishinde 1,5 mln jaǵdaıǵa qyzmet MÁMS esebinen kórsetildi.
Aıta keteıik, jalpy Qazaqstanda neırohırýrgıalyq otalardyń qúny qymbat turady. Onyń sebebi oǵan qajetti materıaldardyń kóbi shetelden ákelinedi. İsikterdi alý otasy 1 mln teńgege deıin tursa, joǵary tehnologıalyq otalardyń eń arzany 1 mln teńgeden bastalady. Máselen, Parkınson operasıasynyń quny 5 mln teńgege deıin barady.
Sonymen birge jýrnalıserge gamma-pyshaq apparaty tanystyryldy. Bul apparatty ulttyq ortalyq ony 2021 jyly satyp alǵan. Ol sáýleniń kómegimen qaterlik isikterge ota jasap, emdeýge múmkindik beredi. Ázirge ol elimizdegi jalǵyz apparat.