Zańger Almaly aýdandyq sotyna shaǵym túsirdi.
Zańger Jangeldi Súleımanov qazaq halqyna dóreki túrde ashyq qoqan-loqqy kórsetken reseılik jýrnalıs Tıgran Keosaıandy sotqa berdi. Bul týraly ol Facebook-tegi paraqshasynda jazdy dep habarlady Almaty-akshamy.kz.
Zańgerdiń sózinshe, Keosaıan aıtqan sózderi úshin zań aldynda jaýap berýi kerek, al qazaqtar únsiz qalmaýy kerek.
«Keosaıan búkil halqymyzdyń namysyna tıdi, ol sózsiz. Bul istegi ustanymy úshin Syrtqy ister mınıstrligine rahmet. Biraq qazaqtar da jaýap berýi kerek. Zańǵa sáıkes, jaýap berýshi sheteldik azamat bolsa da, mundaı ister boıynsha Qazaqstan sotyna aryzdanýǵa bolady.Keshe men Almaty qalasy, Almaly aýdandyq sotyna osyndaı shaǵym túsirdim. Sottan suraıtynym tek bir nárse. Keosaıan aıtqan sózin teriske shyǵaryp, ıýtýb arnasyna jańa vıdeo jarıalasyn. Odan basqa eshteńe qajet emes», – dep jazdy zańger.
Eske salsaq, áleýmettik jelide reseılik jýrnalıs Keosaıannyń elimizde Jeńis kúnine oraı áskerı paradtyń bolmaýyna baılanysty pikir aıtqan vıdeosy tarady. Vıdeoda jýrnalıs dóreki túrde qazaqtarǵa Ýkraınadaǵy shıeleniske baılanysty birjaqty sheshimge kelý kerek ekendigin aıtyp, qańtar oqıǵasy kezindegi reseılikterdiń kómegi týraly da eske aldy.