Ózara yntymaqtastyq týraly kelisim jasaldy
«Qazaqstan Injınırıń» UK» AQ Serbıanyń «YUGOIMPORT-SDPR» kompanıasymen ózara yntymaqtastyq týraly kelisimge qol qoıdy. Kelisimge oraı otandyq ushqyshsyz basqarylatyn ushý apparattary atalǵan memlekettiń naryǵyna shyǵarylmaq, dep habarlaıdy Almaty-akshamy.kz Indýstrıa jáne ınfraqurylymdyq damý mınıstrliginiń baspasóz qyzmetine silteme jasap
Sondaı-aq Kelisim elder arasyndaǵy áskerı tehnıkalyq quraldardy birlese óndirý boıynsha birqatar ýaǵdalastyqtardy qamtıdy. Onyń ishinde zamanaýı áskerı qarý-jaraq túrlerin shyǵarý, qorǵanys-ónerkásip kesheni salasyndaǵy eń jańa álemdik standarttar men praktıkalardy engizý kózdelgen.
Basqosýǵa QR Indýstrıa jáne ınfraqurylymdyq damý mınıstri Qaıyrbek Óskenbaev, ulttyq jáne sheteldik kompanıa ókilderi, sondaı-aq jaýapty uıym basshylary qatysty.
«Qazaqstandyq ónimniń álemdik naryqqa shyǵýy bizge úlken múmkindik beredi. Sonymen qatar suranystyń bolýy – qazaqstandyq ónimniń sheteldik óndirýshilermen básekege túse alatyndyǵynyń aıqyn kórsetkishi dep sanaımyn. Aldaǵy ýaqytta osy taraptaǵy áriptestigimizdi arttyra túsetin bolamyz», – dep atap ótti QR IIDM basshysy.
«Qazaqstan Injınırıń» UK» AQ Basqarma tóraǵasy Temirjan Ábdirahmanovtyń aıtýynsha, aldaǵy ýaqytta Qazaqstan men Serbıa kásiporyndary 82 jáne 120 mm kalıbrli zymyran-artıllerıalyq oq-dáriler men mınometterdi birlesip óndirmek.
«Bizdiń kompanıa úshin bul damýdyń mańyzdy kezeńi. Sheteldik naryqtarǵa shyǵý – bul bizge ózimizdi tanytýǵa, óndiristi keńeıtýge, basqa elderdiń satyp alý áleýetin paıdalanýǵa jáne salany damytýǵa múmkindik beredi», – dedi T. Ábdirahmanov.