Jyldamdyq jáne jalǵa alý jasy shekteldi
Qala turǵyndarynyń elektr samokattarynyń rettelmeıtin qozǵalysy men olardy paıdalanýdyń, sonyń ishinde turaqqa qoıýdyń naqty erejeleriniń joqtyǵyna qatysty kóptegen shaǵymdaryna baılanysty Almaty ákimdigi elektr samokattaryn jalǵa berý servısteriniń qyzmetin retteý jóninde bastama kóterdi, dep habarlaıdy Almaty-akshamy.kz Almaty qalasy ákimdigine silteme jasap.
Nátıjesinde Almaty elektr samokattaryn jalǵa alý naryǵynyń 100%-yn alatyn 4 iri kompanıanyń ókilderimen kezdesýler ótti. Talqylaý barysynda qala turǵyndarynyń múddesi úshin Almatyda jol qozǵalysyna qatysýshylardyń qaýipsizdigin qamtamasyz etýge qatysty memorandým jasaldy.
Memorandýmǵa sáıkes, qalada elektr samokattardyń jyldamdyǵy qosymshalardyń kómegimen 25 km/saǵ deıin shekteledi, jasqa qatysty talaptar kúsheıtiledi – elektr samokattardy tek 16 jastan asqan adamdar ǵana jalǵa ala alady.
Operatorlar elektr samokattardyń metro kireberisteriniń, qoǵamdyq ǵımarattardyń janynda, gazondarda, qozǵalys jáne jaıaý júrginshiler bólikterinde tikeleı jaqyn bolmaýyn qadaǵalaıtyn bolady. Sondaı-aq, qalada arnaıy avtoturaqtar jasalady. Kelesi jyldyń sońyna deıin qalada 3000 turaq ornyn jabdyqtaý josparlanýda.
Jańa erejeler memorandýmǵa qol qoıylǵan sátten bastap bir aı ishinde – aǵymdaǵy jyldyń 15 tamyzyna deıin kúshine enedi.
Eske salsaq, samokattardy jalǵa berý qyzmeti Almatyda 2018 jyldan bastap qolǵa alyndy. Qazirgi ýaqytta naryqta 15 myń elektr samokatyn jalǵa beretin 4 kompanıa (Sym, Jet, Eleven, Whoosh) jumys isteıdi. Búgingi tańda qalada kún saıyn elektr samokattarmen 100 myńǵa jýyq jol qozǵalysy jasalady.