Tenısten Qazaqstannyń quramasy Aýstralıada ótip jatqan aralas komandalar arasyndaǵy United Cup týrnıriniń shırek fınalyna birinshi orynmen shyqty.
Eske sala keteıik, bizdiń qurama S tobyna túsken edi. Birinshi kezdesýde qazaqstandyq tenısshiler Ispanıany 2:1 esebimen jeńdi, dep habarlaıdy aqshamnews.kz Ulttyq olımpıada komıtetine silteme jasap.
Ekinshi machta Qazaqstanǵa qarsylas retinde Grekıa shyqty. Aleksandr Shevchenko álemniń 11-raketkasy Stefanos Sısıpasty 6:4, 7:6 esebimen jeńdi.
Keıinnen Elena Rybakına Marıa Sakkarıdi 6:4, 6:3 esebimen utyp, Qazaqstandy merziminen buryn shırek fınalǵa shyǵardy. Grekıaǵa qarsy machtaǵy úshinshi oıyn týrnırlik mańyzǵa ıe bolmaıdy.
Aıta keteıik, bizdiń qurama pleı-off kezeńine birinshi orynmen shyqty.
Kelesi qarsylas keıinirek anyqtalady.