Qazaqstandyq, álemniń 44-raketkasy Iýlıa Pýtınseva Madrıd WTA 1000 týrnırin jeńispen bastady.
Qazaqstandyq tenısshi alǵashqy aınalymda álemniń 48-raketkasy, amerıkalyq Shelbı Rodjerspen kezdesti. Birinshi partıada esep 5:5 bolǵan mezette Iý.Pýtınseva taǵy bir breıkke qol jetkizip, sosyn osy basymdyǵyn saqtap qaldy – 7:5. Ekinshi setti de breıkpen bastaǵanymen, qarsylasy tarazy basyn teńestire bildi, dep habarlaıdy Almaty-akshamy.kz QazAqparatqa silteme jasap.
Degenmen esep 5:5 bolǵanda, Iýlıa taǵy bir breık jasap, sosyn mach-poıntyn qur jibergen joq – 7:5. Eki saǵatqa sozylǵan tartysty báseke barysynda Iý.Pýtınseva eıs jasamaǵanymen, 12 breık-poınttyń beseýin paıdalandy. Qarsylasy 6 eıs, 3 breıkpen (8 breık-poınt) kózge tústi.
Qazaqstandyq sportshy úshinshi aınalymǵa shyǵý úshin álemniń 16-raketkasy, taǵy bir amerıkalyq Korı Gaýfpen talasady. Ol bastapqy kezdesýinde slovakıalyq Anna Shmıdlovadan aılasyn asyrdy – 6:0, 6:2. Qazaqstannyń birinshi, álemniń 18-raketkasy Elena Rybakına erteń dúnıejúzilik reıtıńte 93-orynda turǵan fransıalyq Osean Dodenmen oınaıdy.
Júlde qory 6,5 mln eýrodan asatyn iri jarys 7 mamyrda márege jetedi.