Qazaqstandyq tenısshi, Ýımbldon-2022 chempıony Elena Rybakına elimizdiń jas tenısshilerine qoldaý kórsetti.
Elena Rybakına «Ýımbldon-2022» jeńisinen keıin júlde qarajatynyń bir bóligi otandyq jas tenısshilerdi qoldaýǵa baǵyttalatynyna ýáde bergen edi, dep habarlaıdy Almaty-akshamy.kz QazAqparatqa silteme jasap.
Al kelesi kúni chempıon qazaqstandyq jas tenısshilerge qoldaý kórsetip, olardyń bolashaqta úzdik oıynshy bolýǵa umtylýyna qarajat bóldi. E.Rybakına jas tenısshilerdi ózi tańdap, nátıjesinde 14 oıynshy 2,5 mln teńgeden aldy. Olardyń qatarynda Lınara Bólesheva, Polına Barabanova, Amına Nurahan, Arıana Gogýlına, Satıma Tóregen, Eva Karysheva, Albına Kákenova, Arýjan Arystanbekova, Dana Baıdáýlet, İńkár Dúısebaı, Aııa Núpbaı, Polına Slepsova, Sandýǵash Kenjebaeva jáne Zara Darken bar.
Sondaı-aq, jas tenısshiler Elenaǵa hat jazyp, atalǵan sportqa kelý tarıhy týraly aıtyp berdi.
«Meniń oıymsha, jas tenısshiler arasynda týrnır uıymdastyryp, olarǵa granttar taǵaıyndaý durys bolar edi. Óıtkeni, men bir kezderi Qazaqstannan úlken qoldaý taptym. Endi jas urpaqtyń damýyna kómektesý - meniń kezegim»,- degen edi Elena Rybakına Ýımbldonda jeńiske jetkennen keıin.
Osylaısha, sportshy óz ýádesin oryndady.