Sıfrlyq damý jáne aeroǵarysh ónerkásibi mınıstri Jaslan Mádıevtiń aıtýynsha, poıyzdardy spýtnıktik ınternetpen qamtamasyz etý josparda bar, dep habarlaıdy aqshamnews.kz
– Jolaýshylar poıyzdaryn OneWeb jáne Starlink spýtnıktik ınternetimen qamtý josparlanyp otyr, – dedi Mádıev.
Starlink spýtnıktik baılanysy amerıkalyq mıllıarder Ilon Maskqa tıesili, al OneWeb – Eutelsat Group kompanıasyna qaraıdy. Eutelsat OneWeb – Ulybrıtanıada ornalasqan Eutelsat Group-tyń enshiles kompanıasy. Sonymen qatar Eutelsat Group OneWeb aksıalarynyń 24%-yna ıelik etedi. Budan bólek, OneWeb-tiń aksıonerleri qatarynda Ulybrıtanıa úkimeti men Bharti Global bar.
Jaslan Mádıevtiń aıtýynsha, Starlink qazirdiń ózinde «Astana – Býrabaı» poıyzynda pılottyq rejımde qoljetimdi. OneWeb jobasyn iske qosý máselesi de qarastyrylyp jatyr.
– «Jolaýshylar tasymaly» aksıonerlik qoǵamy «Jýsan Mobaıl» aksıonerlik qoǵamymen birlesip, poıyzdardy OneWeb spýtnıktik ınternetimen qamtamasyz etý boıynsha synaq ótkizdi. Bul úshin mýltımedıalyq servısterdiń jabdyǵy OneWeb spýtnıkterine beıimdeldi. Pılottyq joba «Astana–Almaty» baǵytyndaǵy №3 jáne №4 Talgo poıyzdarynda, sondaı-aq «Astana–Óskemen» baǵytyndaǵy №67-68 poıyzdarynda júzege asty. Derekterdi berý jyldamdyǵy – sekýndyna 100 Mbıt, – dedi mınıstr.
Pılottyq jobanyń nátıjesi boıynsha sıfrlyq damý mınıstrligi poıyzdardy spýtnıktik ınternetke qosý jumysyn keńeıtýge nıetti.