Mınıstr tehnıkalyq jáne kásiptik bilim berý boıynsha kadrlyq áleýetti arttyrý máselesine jeke toqtaldy.
Ǵanı Beısembaevtyń aıtýynsha, júıeni tabysty transformasıalaý úshin menedjmentti tıimdi qurý qajet. «Bilim berýdegi ózgeristerdiń 1000 kóshbasshysy» jobasy aıasynda eń úzdik halyqaralyq tájirıbeler úlgisinde bilikti basqarýshylardyń kadrlyq rezervi qalyptastyrylýda, dep habarlaıdy aqshamnews.kz sala mınıstrligine silteme jasap.
«Tehnıkalyq jáne kásiptik bilim berýdegi basty mindetterdiń biri - pedagogıkalyq kadrlardyń áleýetin arttyrý bolyp tabylady. Mınıstrlik kolej pedagogteriniń óndirister bazasynda taǵylymdamadan ótýi boıynsha kelisimge qol jetkizdi. Sondaı-aq pedagogterdiń sheberligi men biliktiligin kóterý, onyń ishinde halyqaralyq standarttar, óndiristen mamandardy tartý jáne tálimgerlik ınstıtýtyn damytý boıynsha jumystar júrgizilýde», - dep qorytyndylady mınıstr.
Esterińizge sala keteıik, buǵan deıin oqý-aǵartý mınıstrligi stýdentter men pedagogterdiń Qytaı, Germanıa, Italıa, Túrkıadan tájirıbe men taǵylymdamadan ótýi boıynsha jumys júrgizgen bolatyn. Sonymen qatar qazaqstandyq kolejder stýdentter men pedagogterdiń akademıalyq mobıldiligin keńeıtý arqyly halyqaralyq yntymaqtastyqty damytýda.