Qorjynynda 8 altyn medal bar.
Qazaqstandyq oqýshylar Dúnıejúzilik gımnazıadada 14 medal jeńip aldy. Bul týraly Bilim jáne ǵylym mınıstri Asqat Aımaǵambetov Facebook paraqshasynda jazdy, dep habarlaıdy Almaty-akshamy.kz.
«Ótken aptada biz 250-ge jýyq oqýshymyzdy áýejaıǵa baryp Fransıaǵa shyǵaryp saldyq. Olar alǵash ret Dúnıejúzilik gımnazıadaǵa qatysyp, álemniń 70-ke jýyq elinen kelgen qurdastarymen baq synasyp jatyr. Jarystyń alǵashqy 3 kúninde oqýshylarymyz 14 medal jeńip aldy. Ulttyq qurama qorjynynda 8 altyn, 3 kúmis jáne 3 qola medal bar. Dzúdo, taekvondo jáne júzý jarystaryna qatysýshylar altyn, jeńil atletter men dzúdoshylar kúmis, sondaı-aq dzúdoshylar men taekvondoshylar qola júldeger atandy», - dep jazdy Asqat Aımaǵambetov.
Mınıstr barlyq jeńimpazdy laıyqty jeńisterimen quttyqtaı otyryp, ár medaldyń eńbektiń, tabandylyqtyń, eńbekqorlyq pen tártiptiń jemisi ekenin atap ótti.
«Jaqsy daıyndyq deńgeıin kórsetken muǵalimderińiz ben jattyqtyrýshylaryńyzǵa, sondaı-aq qoldaý kórsetken ata-analaryńyzǵa alǵys aıtamyn. Áýejaıdan shyǵaryp salǵanda sizderdiń umtylystaryńyzdy, talpynystaryńyzdy baıqadym. Aldaǵy oıyndarda jeńister tileımin jáne týǵan jerde sizderdi asyǵa kútip, barlyǵy jankúıer bolyp otyrǵanyn umytpańyzdar», - dedi Asqat Aımaǵambetov.
Vedomstvo basshysy Bilim jáne ǵylym mınıstrligi aldaǵy ýaqytta da Qazaqstandy halyqaralyq deńgeıde abyroımen tanytý úshin oqýshylarǵa jaǵdaı jasaýdy jalǵastyratynyn aıtty.