«Regeneron ISEF-2023» dúnıejúzilik ǵylymı-ınjenerlik konkýrsynyń fınaly 2023 jyldyń 14-19 mamyry aralyǵynda Tehas shtatynyń Dallas qalasynda (AQSH) ótti.
Konkýrs mektep oqýshylarynyń ǵylymı izdeniske degen qyzyǵýshylyǵyn oıatyp, ınjenerlik ǵylym salasyn óskeleń urpaq arasynda keńinen nasıhattaýǵa arnalǵan.
Osy jyly baıqaýǵa dúnıejúziniń 64 elinen 1600-den astam jas izdenýshiler qatysty.
Olar óz elderinde ótken jergilikti jarystar nátıjesinde irikteldi.
El namysyn qorǵaǵan úsh jas ǵalymdar: Saǵyn Jumadildaev – Almaty qalasy NZM 11-synyp oqýshysy (matematıka), Asylhan Qalı – Kókshetaý qalasy NZM 11-synyp oqýshysy (ınformatıka), Aldıar Súleımbekov – Astana qalasy № 60 ML 10-synyp oqýshysy (hımıa).
Úzdik jeńimpazdar eki marapattaý rásiminde anyqtaldy jáne 75 000 AQSH dollary kólemindegi bas júldeni jarıalaýdy qamtydy. Ol San-Hose qalasynan (AQSH, Kalıfornıa sht.) kelgen 17 jastaǵy Keıtlın Vangqa berildi. Jalpy alǵanda, ınovasıa men zertteý tereńdigi negizinde baǵalanǵan jumystarǵa shamamen 9 mıllıon dollar berildi.
Qazaqstan quramasynyń múshesi Saǵyn Jumadildaevtyń «L-tromino tilings for portions of square lattice» jobasy ekinshi orynmen jáne Mu Alpha Theta akademıasynyń 1000 dollar kóleminde aqshalaı syılyǵymen marapattaldy.
Syılyq joǵary synyp oqýshylarynyń matematıka salasynda eń kúrdeli, jan-jaqty jáne shyǵarmashylyqpen zerttelgen jobalary úshin beriledi. Zertteý tarmaqtaryna kóbinese matematıkalyq dáleldeý men modeldeý, statısıkalyq taldaý, vızýalızasıa kiredi.
«Qazaqstan quramasy Kórmege 2000 jyldan beri tolyqqandy múshe bolyp tabylady. Bul jyly taldyqorǵandyq oqýshy Danıar Kamenov matematıkadan bedeldi ekinshi oryndy jeńip alǵan edi.
Sondaı-aq, 2012 jylǵy baıqaýda qaraǵandylyq mektep oqýshysy Ásıa Qusaıynovanyń juldyzy jandy. Qazaqstandyq oqýshynyń ǵylymı jobasy jelde jumys isteı alatyn yqsham kóp qalaqty jel týrbınasyn jasaǵany úshin birinshi oryn men «Injenerlik jumystar arasynda nomınasıa boıynsha úzdik» ataǵyna ıe boldy», - deıdi «Daryn» respýblıkalyq ǵylymı-praktıkalyq ortalyǵynyń dırektory Ǵajdembek Tursynov.
Aıta ketsek, «Regeneron ISEF-2023» dúnıejúzilik ǵylymı-ınjenerlik konkýrsy 1950 jyldan bastap AQSH-ta jyl saıyn ótkizilip keledi.