Bul - Úkimet basshysynyń sózi.
Dohada ótip jatqan úshinshi Qatar ekonomıkalyq forýmy aıasynda QR Premer-Mınıstri Álıhan Smaıylov pen Qatar Ámiri sheıh Támım bın Hamad Ál Tánı kezdesý ótkizdi, dep habarlaıdy Almaty-akshamy.kz
Álıhan Smaıylov Qatar Ámirine Memleket basshysy Qasym-Jomart Toqaevtyń ystyq sálemi men izgi tilegin jetkizip, dúnıejúzi qoǵamdastyǵynyń nazaryn aýdarǵan fýtboldan álem chempıonatynyń sátti ótýimen quttyqtady.
Premer-Mınıstr Qatar Qazaqstannyń arab álemindegi mańyzdy saıası jáne ekonomıkalyq seriktesi ekenin atap ótti. Munyń dáleli ózara saýda men ınvestısıalar salasyndaǵy joǵary kórsetkishter bolyp tabylady. Máselen, osy jyldyń birinshi toqsanynda ǵana ekijaqty taýar aınalymynyń kólemi 17,7 ese ósse, 2022 jyldyń qorytyndysy boıynsha respýblıkaǵa quıylǵan Qatar ınvestısıalarynyń kólemi 3 ese artqan.
«Bul rette biz ózara saýda kólemin odan ári ulǵaıtý boıynsha budan da joǵary áleýettiń baryn kórip otyrmyz. Osyǵan baılanysty Qatarǵa 60 taýar pozısıasy boıynsha qazaqstandyq ónimniń eksportyn shamamen $243 mln-ǵa ulǵaıtýdy usyndyq. Sonymen qatar biz ınvestısıalyq áriptestikti odan ári keńeıtýge múddelimiz», — dedi Álıhan Smaıylov.
Osy turǵyda Úkimet basshysy Qatar Investment Authority men «Samuryq-Qazyna» memlekettik qorlary arasyndaǵy yntymaqtastyqtyń jáne Birlesken tikeleı ınvestısıalar qoryn qurý josparlarynyń mańyzdylyǵyn atap ótti.
Óz tarapynan sheıh Támım bın Hamad Ál Tánı basym baǵyttardyń barlyǵy boıynsha ekijaqty ózara is-qımyldy nyǵaıtýǵa daıyn ekenin rastady.