Ár eldiń syrtqy qarym-qatynasynda aldymen ekonomıkalyq sala basym turatyny belgili.
Al Qazaqstan men Germanıa arasyndaǵy baılanys adamı kapıtalmen qundy. Búginde bul elde jarty mıllıonǵa jýyq qazaqstandyq nemis ómir súredi, dep habarlaıdy Almaty-akshamy.kz 24.kz-ke silteme jasap.
Tarıhı otanyna qonys aýdarǵanyna qaramastan, bári áli kúnge deıin qazaq jerin saǵynatyndaryn jasyrmaıdy. Alekseı Shraıner Qazaqstanda týyp ósken. Jastaıynan atqa jaıdaq minip, asyqtaı shıraq bop erjetedi. Biraq 1999 jyly onyń otbasy tarıhı otanyna oralýǵa bel býady. Sodan beri qansha ýaqyt ótse de, kindik qany tamǵan Qazaqstan bir sátke esinen ketpegen. Balalyq shaǵy ótken Kókshetaýdy qatty saǵynǵanyn aıtady.
- Men 21 jasyma deıin Qazaqstanda ómir súrdim. Kókshetaýda bilim aldym. Áli kúnge deıin keń dalanyń ıisi esimnen ketpeıdi. Arada qansha ýaqyt ótse de, kóz aldyma alǵashqy úıimiz elesteıdi. Tipti túsime de kiredi. Bala kezde áke-sheshem Qarqaralyǵa jıi jiberetin. Sol kezde kókem alǵash ret atqa mingizgen edi, - deıdi Ars Pro Dono galereıasynyń negizin qurýshy Alekseı Shraıner.
Búginde Alekseı tabysty kásipker. Galereıanyń ıesi. Osydan 20 jyl buryn jıǵan-tergeniniń bárin soǵan jumsap, endi jemisin kórip otyr. Munda Grýzıa, Ýkraına, Polsha men Qazaqstannan shyqqan qylqalam sheberleriniń týyndylary usynylǵan. Alekseıdiń aıtýynsha, osylaısha ol Berlın halqyn qazaq ónerimen tanystyrýǵa tyrysady.
Alekseı Shraıner, Ars Pro Dono galereıasynyń negizin qurýshy: - Berlın mıllıondaǵan turǵyny bar iri megapolıs qoı. Sáıkesinshe bizdiń galereıaǵa kelýshiler sany da kóp. Bári qazaq sýretshileriniń shyǵarmalaryn kórip tamsanady.
Jyldar ótse de, Germanıadaǵy qazaqstandyq nemister áli kúnge deıin bizdiń dástúrdi berik ustanady. Taǵamdarymyzdy ázirlep, tilimizdi qurmetteıdi.
Natalá Shraıner, Alekseıdiń jary: - Súıikti taǵamymyz manty men palaý. Nemelerimiz de, balalarymyzda óte jaqsy kóredi. Ony qalaı ázirleý keregin kezinde jubaıymnyń ózi úıretken bolatyn.