Grekıanyń soltústik-shyǵysyndaǵy Dadıa ulttyq saıabaǵynda orman órtinen keıin 26 adamnyń máıiti tabyldy, dep habarlaıdy Almaty-akshamy.kz Euronews-ke silteme jasap.
Sırek kezdesetin qustardyń uıa salatyn jeri retinde belgili qoryq arqyly zańsyz mıgranttardyń baǵyty ótedi.
Orman órtiniń ekinshi tolqynynyń taǵy bir qurbany Beotıadaǵy qart shopan boldy.
«Órt sóndirýshiler Aleksandrýpolıstegi Avant aýdanynda lashyq janynan 18 adamnyń denesin tapty. Jaqyn mańdaǵy aýdandardan turǵyndardyń joǵalyp ketýi týraly eshqandaı málimdeme túspegenin eskergende, bul elge zańsyz kirgen adamdar. Kesheden beri búkil aýdan boıynsha evakýasıalaý týraly 112 habarlama jiberildi», - dep málimdedi Grekıanyń órt sóndirý departamentiniń ókili Iannıs Artopıos.
Seısenbide grek órt sóndirý bólimi Afıny qalasynyń soltústigindegi myńdaǵan turǵyndardy evakýasıalaýǵa buıryq berdi. Ano Lıosıada 25 myńǵa jýyq adam turady. Jergilikti bılik kórshiles Fılı aýdanynda úıler órtengen soń adamdardy qaýipti jerge shyǵarýǵa sheshim qabyldady.
Grekıanyń soltústik-shyǵysyndaǵy Evıa men Kıfnos araldary, sondaı-aq Afınydyń soltústigindegi Boeotıa jalynǵa oranǵan. Peloponnes pen eldiń batysy da órtenip jatyr.
Demalys kúnderi elde ondaǵan órt shyǵyp, myńdaǵan turǵyn evakýasıalandy. Órt eń qatty taralǵan aımaq eldiń soltústik-shyǵysyndaǵy Aleksandrýpolıs portynyń janynda, Túrkıa shekarasyna jaqyn jerde ornalasqan. Ondaǵy jalyn birneshe kúnnen beri órship keledi. Qala mańyndaǵy 13 eldi mekenniń turǵyndary evakýasıalandy.
Buǵan deıin Grekıa bıligi ádetten tys joǵary aýa temperatýrasy men qatty jel órt sanyn kóbeıtýi múmkin dep málimdegen.