Mınıstrdiń aıtýnsha, 2021-2022 jyldyń qysy jyly boldy, bul ıtbalyqtar úshin qolaısyz.
QR Ekologıa, geologıa jáne tabıǵı resýrstar mınıstri Serikqalı Brekeshev jyl basynan beri birneshe ret tirkelgen ıtbalyqtardyń qyrylý sebebine qatysty zertteý qorytyndysymen tanystyrdy, dep habarlaıdy Almaty-akshamy.kz QazAqparatqa silteme jasap.
«Jyl basynan beri Qarajambas jáne Túpqaraǵan túbeginiń ońtústik-batys bóliginen 220 ıtbalyqtyń óleksesi tabyldy. Ólekseler soltústik jáne orta Kaspıı akvatorıasyndaǵy daýyl men soltústik-batys jáne batystan soqqan jeldiń áserinen jaǵaǵa shyǵyp qalǵan. Osy jaǵdaıǵa baılanysty bizdiń Balyq sharýashylyǵy komıteti túrli ǵylymı uıymdar jáne memlekettik quzyrly organdarmen birlesip, zertteý jumysyn júrgize kele, kelesi qorytyndyǵa keldi. Tabylǵan ıtbalyq ólekseleri ydyrap ketkendikten, saraptama alý múmkin bolmady. Soǵan qaraǵanda, teńiz janýarlary birneshe aı buryn ólgen», - dedi Serikqalı Brekeshev Ortalyq komýnıkasıalar qyzmeti alańynda ótken baspasóz máslıhatynda.
Mınıstrdiń aıtýynsha, tek 67 ólgen ıtbalyqtyń qańqasyna tekserý jáne ólsheý júrgizildi.
«Olardyń 25 paıyzynan nemese 17 ıtbalyq óleksesinen ólimge alyp kelýi múmkin mehanıkalyq áser izderi anyqtaldy. Oǵan sebep ıtbalyqtardyń balyq aýlaý torlaryna túsip qalýy, olardyń túrli jaraqat alýy nemese ıtbalyqtardyń tyıym salynǵan aýlaý quraldaryna tap bolýy múmkin», - deıdi ol.
Zertteý nátıjesinde 19 ıtbalyqtyń jasyn anyqtaý múmkin bolǵan. Atap aıtqanda, olardyń 52 paıyzy nemese 10 ıtbalyq 2021-2022 jyldyń qysynda týǵan.
«Itbalyq kúshikteriniń ólimin olardyń álsizdigimen, sýyq sýdan qatyp qalýymen ıaǵnı jańa týǵan ıtbalyqtardyń birden ashyq muzdy teńizge shyǵýymen baılanystyryp otyr. 2021-2022 jyldyń qysy jyly boldy, bul ıtbalyqtar úshin qolaısyz. Joǵaryda atalǵan faktiler olardyń tabıǵı ólimine ákeldi. Jalpy tabylǵan ıtbalyqtardyń eresek jasy 13 jyl. Barlyq ólekse tekserýden soń sanıtarlyq normalardy saqtaı otyryp óńdeldi», - deıdi S. Brekeshev.
Vedomstvo basshysy ıtbalyqtar óliminiń taǵy bir sebebin Qashaǵan ken ornyndaǵy tereńdetý jumysymen baılanystyryp otyr.