Respýblıkalyq fızıka-matematıka mektebi (RFMM) Orta Azıada Apple Authorized Training Center for Education (AATCE) mártebesin alǵan alǵashqy bilim ordasy atandy, dep habarlaıdy aqshamnews.kz.
Bul týraly Qazaqstan Respýblıkasy Oqý-aǵartý mınıstrliginiń baspasóz qyzmeti habarlaıdy. AATCE mártebesi mekteptiń sıfrlyq pánderdi oqytý jáne IT mamandaryn daıarlaý salasyndaǵy Apple kompanıasynyń halyqaralyq standarttaryna sáıkestigin rastaıdy. Oqý baǵdarlamasy mektep oqýshylary úshin arnaıy ázirlenip, «Develop in Swift» sertıfıkattalǵan kýrsyn qamtıdy, bul oqýshylarǵa mektep aıasynda Swift tilin meńgerýge jáne iOS úshin mobıldi qosymshalaryn ázirleýge múmkindik beredi.
«Osy ýaqytqa deıin mundaı ortalyqtar negizinen Eýropa men Soltústik Amerıka elderindegi ýnıversıtetterde ashyldy. RFMM oqýshylarynyń oqytý men tehnologıalyq daıarlyǵynyń joǵary deńgeıi Apple moıyndaǵan bilim berý deńgeıiniń biregeı úlgisi boldy», — dep atap ótti iTeacher Academy (Apple Authorized Reseller) negizin qalaýshy Iýlıa Andreeva.
8-9 synyp oqýshylaryna arnalǵan sabaqtar aptasyna eki ret ótedi. Kýrs barysynda oqýshylar baǵdarlamalaýdyń negizderin, mobıldi qosymshalardyń qurylymyn úırenip, ózderiniń IT-jobalaryn jasaıdy. Sondaı-aq, olar Swift Student Challenge sıaqty halyqaralyq Apple baıqaýlaryna qatysý múmkindigin alady. Bastaýysh synyp oqýshylaryna Apple ekojúıesimen tanysý jáne negizgi sıfrlyq daǵdylardy meńgerýge arnalǵan kýrstar uıymdastyrylǵan.
«Qazaqstanda AATCE ortalyǵynyń ashylýy – sıfrlyq bilim berýdi damytýdaǵy mańyzdy qadam. Ol oqýshylarymyzdyń álemdik úzdik bilim berý standarttaryna qol jetkizýine jol asha otyryp, óńirlik deńgeıde IT daıyndyǵy salasyndaǵy kóshbasshylyqty nyǵaıtýǵa serpin beredi», — dep atap ótti QR Oqý-aǵartý mınıstrliginiń resmı ókili Mereke Amangeldiqyzy.
Aıta keteıik, sońǵy jyldary Qazaqstan mektepterinde bilim berý júıesin sıfrlandyrý baǵytynda júıeli jumystar atqarylýda. Ulttyq bastamalar aıasynda mektep oqýlyqtarynyń 100%-y sıfrlyq formatqa aýystyryldy, mektepterdiń 95,2%-da ınternetke qoljetimdilik sapasy aıtarlyqtaı jaqsartyldy, sıfrlyq bilim berý platformalary engizilýde, oqý prosesine jasandy ıntellekt elementteri ıntegrasıalanýda. Bul sharalar bilim sapasyn arttyrý jáne oqýshylardy sıfrlyq bolashaqtyń syn-tegeýrinderine daıyndaýǵa baǵyttalǵan.