Mádenıet jáne aqparat mınıstrliginiń keńeıtilgen Alqa otyrysynda Parlament Senatynyń depýtaty Bıbigúl Jeksenbaı elimizdiń medıa salasy birqatar júıeli máselelerge tap bolyp otyrǵanyn atap ótti. Bul týraly Aqshamnews.kz saıty habarlaıdy.
Sıfrlyq transformasıa jáne óńirlik BAQ-tyń artta qalýy
Qazaqstandyq dástúrli BAQ sıfrlyq formatqa kóshý barysynda qıyndyqtarǵa tap bolýda. Ásirese, óńirlik basylymdar tehnologıalyq ózgeristerge ilese almaı, qarjylyq jáne kadrlyq máselelerge baılanysty damýdan kenje qalýda. Aýdıtorıanyń onlaın platformalarǵa kóshýi dástúrli medıanyń yqpalyn álsiretip otyr.
Medıa saýattylyq jáne jalǵan aqparat máselesi
Halyq arasynda aqparatty synı turǵydan baǵalaý deńgeıi tómen, bul feık aqparattyń taralýyna jáne manıpýlásıaǵa jol ashady. Sonymen qatar, zańnamalyq bazanyń sıfrlyq platformalardy qamtymaýy blogerler men onlaın medıalar qyzmetin retteýde quqyqtyq vakým týdyryp otyr.
Qarjylandyrý jáne medıa naryqtaǵy báseke
Qazaqstandyq BAQ kóbine memlekettik tapsyrysqa táýeldi, al táýelsiz basylymdar jarnama men oqyrmandardyń qoldaýyna súıenýge májbúr. Jarnama naryǵy shaǵyn bolǵandyqtan, otandyq medıalar sheteldik iri platformalarmen (Google, Meta) básekelese almaıdy. Memleket granttar men memlekettik tapsyrystardy ártaraptandyryp, jańadan qurylǵan medıalardy qoldaýǵa nazar aýdarýy kerek.
Aýdıtorıanyń senimsizdigi jáne aqparattyń birjaqtylyǵy
Qoǵam memlekettik medıanyń resmı aqparatty birjaqty jetkizetinin sezinedi. Al áleýmettik jelilerde taraıtyn málimetter jyldam ári túrli kózqarastardy qamtıtyndyqtan, aýdıtorıanyń qyzyǵýshylyǵy dástúrli BAQ-qa qaraǵanda tómendeýde. Memlekettik BAQ óz kontentin ashyqtyq, obektıvtilik, faktchekıng qaǵıdalaryna negizdeýi tıis.
Kadr tapshylyǵy jáne kásibı standarttardyń tómendeýi
Jýrnalısıka salasynda bilikti mamandar jetispeıdi. Aqparattyq resýrstarda sapasyz aýdarmalar, kásibı etıkanyń buzylýy jıi kezdesedi. Jalaqynyń tómendigi saldarynan tájirıbeli jýrnalıser basqa salalarǵa aýysyp ketýde. Jýrnalısıka fakúltetteriniń bilim sapasyn arttyryp, medıa mamandaryn turaqty oqytý qajet.
Óńirlik baspasózdiń tıimsizdigi
Oblystyq jáne aýdandyq gazetter ákimdik qyzmetin dáripteýge baǵyttalǵandyqtan, halyqtyń shynaıy máseleleri kóterilmeıdi. Bul oqyrmannyń qyzyǵýshylyǵyn tómendetip, aqparattyń ózektiligin joıady. Mysaly, Aqmola oblysy Arshaly aýdandyq gazetine 20 mln teńge bólingenimen, taralymy nebári 1000 dana. Al aýdanda 48 myń halyq baryn eskersek, bul qarjynyń tıimsiz jumsalǵanyn kórsetedi.
Qazaqstannyń medıa salasy kúrdeli ózgeristerdi qajet etedi. Sıfrlyq transformasıany jedeldetý, medıa saýattylyqty arttyrý, quqyqtyq bazany jetildirý jáne ádil báseke ornatý – otandyq medıany jańa deńgeıge kóterýdiń basty sharttary.