Osy maqsatta arnaıy joba pılottyq rejımde iske qosyldy.
Qazaqstannyń Indýstrıa jáne ınfraqurylymdyq damý mınıstrligi qurylys salasyndaǵy sapa men ashyqtyqty baqylaýdy kúsheıtý boıynsha jumys júrgizýde, dep habarlaıdy Almaty-akshamy.kz.
«Búgingi tańda «E-Qyrylys» biryńǵaı qurylys portaly engizilgen. Atalǵan júıe ózekti málimetterdi jedel jınaý jáne baqylaýdy avtomattandyrý arqyly ǵımarattar, qurylystar men avtomobıl joldary qurylysynyń sapasyn joǵarylatýǵa, sondaı-aq memlekettik organdardyń qurylys salasy sýbektilerimen ózara is-qımylynyń tıimdiligi men ashyqtyǵyn arttyrýǵa múmkindik beredi»,- delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
Qurylys portaly aqparattyq qaýipsizdik synaǵynan ótip, ónerkásiptik paıdalanýǵa engizildi.
Júıe pılottyq rejımde 83 avtomobıl joldary jobasy men 80 turǵyn úı jobasynda júzege asyryldy. Buǵan deıin portaldyń memlekettik fýnksıalardy júrgizý boıynsha modýlderi iske qosyldy. Atap aıtqanda, qurylys tizilimderi júkteldi, tizilimderge ózgerister men tolyqtyrýlar engizý rásimi avtomattandyryldy, tehnıkalyq qadaǵalaý eseptiligi elektrondyq formatqa aýystyryldy jáne sarapshylardy testileý avtomattandyryldy.
Jalpy, portal barlyq kezeńderdegi qurylys prosesterin onlaın-rejımde baqylaýǵa múmkindik beredi.
«E-SHańyraq» júıesi týraly aıtar bolsaq, jobany iske asyrý memlekettik-jekemenshik áriptestik tetigi boıynsha búdjettik qarjylandyrýsyz jeke bastama boıynsha júzege asyrylady. Búgingi tańda 3 IT-kompanıamen ıntegrasıa boıynsha jumystar júrgizilýde. Kózdelgen negizgi maqsat — úıdi basqarý jónindegi naryqtyq qosymshalardan, memlekettik derekter bazalarynan jáne tabıǵı monopolıalar sýbektileriniń aqparattyq júıelerinen alynǵan úlken derekterdi taldaý esebinen basqarýshylyq sheshimder qabyldaýdyń tıimdiligin arttyrý.
Aıta keterligi, portal turǵyn úı-kommýnaldyq sektorynda shashyrańqy júıelerden aqparattyń ortalyqtandyrylǵan shoǵyrlanýyn qamtamasyz etedi.