Birshama tómendedi.
QR UB aqsha-kredıt saıasaty departamentiniń dırektory Rústem Orazalın mamyr aıyndaǵy iskerlik belsendilik ındeksi týraly málimet berdi, dep habarlaıdy Almaty-akshamy.kz Inbusiness.kz silteme jasap.
Mamannyń sózine súıensek, mamyrda iskerlik belsendilik ındeksi 49,0 (sáýirde – 49,5) bolyp, birshama tómendegen. Degenmen kórsetkish «geosaıası jaǵdaıdyń jáne onymen baılanysty saldardyń yqpalynda bolǵan naýryzdaǵy deńgeıden (48,2)» joǵary.
«İskerlik belsendiliktiń ósýi óndiris sektorynda baıqaldy: ındeks 50,9-ǵa deıin kóterildi (sáýirde – 50,5). Qyzmet kórsetý sektorynda jáne taý-ken óndirý ónerkásibinde iskerlik belsendilik, tıisinshe, 48,8-ge jáne 48,3-ke deıin tómendedi. Qurylysta ındeks 44,6-dan 46,2-ge deıin kóterildi», - deıdi Rústem Orazalın.
Aıta ketsek, barlyq sektorda jetkizilim merzimderi uzarǵan. Qurylysta jumyspen qamtý jaǵdaıy azdap jaqsarǵan, biraq tapsyrys kólemi tómen deńgeıde qalyp otyr.
«2022 jylǵy mamyrda kásiporyndardyń aǵymdaǵy bıznes-jaǵdaılardy baǵalaýy ózgerissiz qaldy. Teris ózgeristerdi atap ótken respondentter sany burynǵysynsha basym. Alaıda, kásiporyndardyń bolashaq bıznes-jaǵdaılaryna qatysty senimi aıtarlyqtaı jaqsardy (keleshek jaǵdaılardy baǵalaý bıylǵy sáýirdegi 7,3-ten 22,5-ke deıin ulǵaıdy). Nátıjesinde aǵymdaǵy jáne bolashaq bıznes-jaǵdaılardy ortasha baǵalaýdy bildiretin bıznes-ahýal ındeksi bıznesti júrgizýdiń bolashaq jaǵdaılaryna qatysty, ásirese, qurylys salasyndaǵy kásiporyndarda optımızmdi jaqsartý esebinen 9,2 (sáýirde – 2,2) qurap, aıtarlyqtaı jaqsardy», - dedi departament dırektory.